Morgunblaðið | 20.7.2023 | 12:02

Nýja eiginkonan 38 árum yngri

Emma Krokdal var aðeins 19 ára gömul þegar parið tók saman árið 2015. Samsett mynd

Sænski leikarinn Dolph Lundgren og unnusta hans, einkaþjálfarinn Emma Krokdal, eru formlega orðin hjón. Parið gifti sig á heimili sínu á grísku eyjunni Mykonos en athöfnin fór fram með lágstemmdum hætti og voru aðeins vinir og vandamenn viðstaddir. Þetta er annað hjónaband Lundgrens, en 38 ár aðskilja Lundgren og Krokdal.

Lundgren, 65 ára, giftist hinni 27 ára gömlu Emmu Krokdal á Grikklandi hinn 13. júlí síðastliðinn. „Við ákváðum að fagna ástinni með því að gifta okkur á heimili okkar í Mykonos, umvafin fjölskyldu og nokkrum nánum vinum,“ sagði parið í sameiginlegri yfirlýsingu við People.

Lundgren og Krokdal byrjuðu saman árið 2015 þegar Krokdal var aðeins 19 ára. Sama ár greindist leikarinn með krabbamein í nýrum. Lundgren náði tímabundnum bata en örfáum árum síðar tók krabbameinið sig upp aftur og hafði þá dreift sér í lifrina. Krokdal hefur verið með honum í baráttunni og staðið við hlið hans.

Leikarinn var áður giftur Anette Qviberg og á með henni tvær dætur, Idu Sigrid og Gretu Eveline. Ida Sigrid er fædd sama ár og Krokdal.