Morgunblaðið | 31.7.2023 | 21:59 | Uppfært 1.8.2023 10:45

Vetrarþáttaröð Love Island skipt út fyrir stjörnuleit að ástinni

Sanam Harrinanan og Kai Fagan sigruðu síðustu vetrarþáttaröð af Love Island, sem hefur nú verið tekin af dagskrá. Samsett mynd

Ný vetrarþáttaröð raunveruleikaþáttanna vinsælu Love Island mun ekki eiga sér stað á næsta ári. Í staðinn verður sett upp leit að ástinni með góðkunningjum sem hafa áður tekið þátt. Koma þeir úr öllum útgáfum þáttanna, frá Bretlandi, Ástralíu og Bandaríkjunum.

Samkvæmt heimildum Daily Mail mun nýja stjörnuþáttaröðin fara í loftið snemma árs 2024. Forráðamenn ITV, sjónvarpsstöðvarinnar sem framleiðir þættina, höfðu vonast til þess að nýja kynninum, Mayu Jama, tækist að draga til sín meira áhorf á vetrarþáttaröðina. Þrátt fyrir vinsældir hennar fékk þáttaröðin sem tekin var upp í Suður-Afríku þó ekki sama áhorf og sumarþáttaröðin.

Fyrsta vetrarþáttaröðin var sýnd árið 2020 en var tekin af dagskrá næstu ár á eftir, allt þar til Maya Jama tók við sem kynnir af Lauru Whitmore fyrr á þessu ári. Samkvæmt heimildum Daily Mail verður þáttaröðin tekin upp í Suður-Afríku.