Morgunblaðið | 3.8.2023 | 9:09

„Það er lítið að gerast á miðunum“

Jóna Eðvalds hefur ásamt öðrum uppsjávarskipum leitað makríls. Ljósmynd/Valur Hafsteinsson

Hægt hefur verulega á makrílveiðum uppsjávarskipanna í íslenskri lögsögu og stendur nú yfir leit að makríl í veiðanlegu magni. Nokkur skip eru enn á miðunum rétt austur af landinu en flest voru á leið í átt að Smugunni en héldu sig þó innan lögsögunnar.

Heiðar Erlingsson, skipstjóri á Jónu Eðvalds, segir í samtali við Morgunblaðið veiðina ganga illa. „Það er lítið að gerast á miðunum. Það er heldur dauft hjá öllum.“

Spurður hvort stefnan sé sett á Smuguna segir hann svo ekki vera. „Það eru veðurskil á leið inn í Smuguna, þannig að það er von á leiðindaveðri þar. Svo hefur ekkert verið að fá heldur, það virðist vera alveg sama hvert sem er litið.“

Nánar er fjallað um málið í Morgunblaðinu í dag.