Vísindamenn hafa séð merki þess í rannsóknum sínum að konur eldast hraðar á vissum tímabilum í lífi þeirra.
Weiqi Zhang, sem leiðir hóp rannsakenda hjá Beijing Institute of Genomics í Kína, segir að ástæðan fyrir þessu séu líklega hormónar enda eru konur á þessum aldri oftar en ekki að eiga börn eða að ganga í gegnum breytingaskeiðið.
113 konur á aldrinum 20 til 66 ára tóku þátt í rannsókninni. Greind voru lífssýni og þær spurðar um matarræði og lífsstíl. Þá voru teknar myndir af andlitunum og þær mældar í bak og fyrir og blóðþrýstingurinn mældur sömuleiðis. Þá voru teknar blóðprufur og þvag- og saursýni svo fátt eitt sé nefnt.
Niðurstöður leiddu í ljós að þær sem borðuðu yfirleitt hollan mat sem samanstóð af grænmeti og ávöxtum voru oftar en ekki „líffræðilega yngri“. Þá var eftir því tekið að konur á aldrinum 30 til 50 ára sýndu fram á hraðari öldrun.
Öldrun væri því að miklu leyti háð hormónabreytingum.
„Þessar niðurstöður gefa til kynna að öldrunarferli kvenna er að miklu leyti drifið áfram af hormónakerfinu,“ segir Zhang.
Þátttakendur eldri en 45 ára sem voru einnig að taka inn hormónalyf við breytingaskeiðinu virtust eldast hægar en þær sem voru ekki á hormónalyfjum.
„Slík lyfjameðferð getur komið í veg fyrir að hormónin í líkamanum minnki of hratt og þar með hægt á öldrunarferlinu.“
Endurtaka þyrfti rannsóknina með stærra úrtaki til þess að fá áreiðanlegri niðurstöður sem mætti alhæfa út frá. Þá stendur einnig til að framkvæma svipaða rannsókn á karlmönnum og hvort öldrunarmynstur þeirra sé öðruvísi.