Björn Gunnlaugsson, starfandi skólastjóri í Laugarnesskóla, segir að unnið hafi verið að bráðabirgðalausnum vegna mygluvandamála í skólanum í sumar.
Eins og sakir standa verður skólinn tekinn í gegn næsta sumar ef marka má nýjustu tímasetningu frá borginni.
„Það þarf að taka alla skólabygginguna gjörsamlega í gegn. Þá verður skólastarfið flutt úr byggingunni. Sú aðgerð tekur eitt og hálft ár. Við vitum ekki alveg hvenær það hefst því í hvert skipti sem við fáum fund og upplýsingar um áætlaðan dag á framkvæmdunum þá er hann seinna en síðast þegar okkur var sagt eitthvað. En samkvæmt nýjustu upplýsingum er stefnt á að hefja framkvæmdir sumarið 2024,“ segir Björn.
Hann segir að allt skólastarfið muni verða fyrir áhrifum af framkvæmdunum. Aðalbyggingin verður tekin fyrst en skrifstofuhluti byggingarinnar verður tekinn í framhaldinu.
Á meðan framkvæmdum stendur verða nemendur vistaðir í hollum í bráðabirgðahúsnæði á skólalóðinni.
Að sögn Bjarnar var byggingarefni fjarlægt úr að minnsta kosti 12 kennslustofum í sumar og bráðabirgðabyggingarefni sett í staðinn.
„Við vitum að húsnæðið lekur ennþá og markmiðið með þessu er að sjá miklu betur hvað gerist þegar vatn kemur inn. Myglan mun því ekki geta læst sig í panel eða gólfdúkum því búið er að fjarlægja þá. Markmiðið með þessu er að myglan muni verða til friðs þangað til framkvæmdir hefjast á næsta ári. Svo verðum við að sjá hvort það gengur eftir,“ segir Björn.
Upphaflega áttu framkvæmdir að hefjast við skólann í vor en þeim var svo frestað og er nú áætlað að verkið hefjist næsta vor.
Skólinn var settur í dag. Björn er sitjandi skólastjóri og er ráðinn til bráðabirgða til áramóta. Hann tók við af starfinu af Sigríði Heiðu Bragadóttur sem sagði upp starfi sínu að læknisráði vegna mygluvandamálanna.