Morgunblaðið | 5.9.2023 | 11:52 | Uppfært 12:56

Skoðar að senda bátana út í fyrramálið

Kristján Loftsson, framkaæmdastjóri Hvals hf. mbl.is/Árni Sæberg

„Við tökum stöðuna á hverjum degi, en okkur hefur ekki litist á sjólagið. Við þurfum að hafa gott sjólag til að geta stundað veiðarnar og þess vegna höfum við frestað því þar til í fyrramálið að skoða það að senda bátana út. Við verðum að hafa sæmilegt veður, það virðist geta orðið sæmilegur gluggi á fimmtudaginn,“ segir Kristján Loftsson framkvæmdastjóri Hvals hf. í samtali við mbl.is þegar leitað var svara hjá honum um það hvenær hann hygðist senda hvalbátana á miðin suður og vestur af landinu.

Spurður um mótmælendur sem komið hafa sér fyrir í tunnunum í mastri hvalbátanna segist Kristján ekki hafa hugmynd um stöðu mála hjá þeim.

„Þetta eru einhverjir flækingar“

„Þetta eru einhverjir flækingar, önnur er frá Bandaríkjunum en hin einhverstaðar úr Evrópu,“ sagði Kristján og er ósáttur við umfjöllun sjónvarpsstöðvanna um málið. „Fjölmiðlarnir, sérstaklega sjónvörpin, tala um borgaralega óhlýðni og að það sé allt í lagi. Það er eins og verið sé að reyna að koma því inn hjá þjóðinni að það sé allt í lagi. Ef maður gleymir að læsa hjá sér heima og kemur síðan að einhverjum sitjandi inni á gólfi sem segjast vera að mótmæla og vill að borinn sé í sig matur og fleira, yrði fólk ánægt með það?,“ spyr Kristján.

Aðspurður segist Kristján að mótmælin hafi ekki valdið sér neinu tjóni og býst ekki við að þessar aðgerðir mótmælendanna hafi nein eftirmál af sinni hálfu.

„Þær eru bara þarna og við sjáum til hvað setur. Við höfum ekkert aðhafst í þessu máli, lögreglan er þarna og sér um þetta. Við skiptum okkur ekki af því,“ segir Kristján.