Morgunblaðið | 12.9.2023 | 18:00 | Uppfært 21:25

Harma tjón vegna laxaflótta

Daníel Jakobsson, framkvæmdastjóri viðskiptaþróunar hjá Arctic Fish, harmar óhappið sem varð í Patreksfirði í ágúst.

„Það sem helst stendur upp úr er að við bjóðum upp á að farið verði í skönnun á þessum ám sem undir liggja og finnist eldislax verði hann tekinn út,“ segir Daníel Jakobsson, framkvæmdastjóri viðskiptaþróunar hjá laxeldisfyrirtækinu Arctic Fish, í samtali við mbl.is um sleppingu eldislax úr sjókví í Kvígindisdal í Patreksfirði sem kom í ljós 21. ágúst.

Eins og mbl.is greindi nýlega frá fjölgar þeim tilfellum ört þar sem laxveiðimenn verða varir við laxa sem grunsemdir benda til að séu eldislaxar ættaðir frá Patreksfirði.

„Við reynum auðvitað að draga úr því óhappi sem þarna varð,“ heldur Daníel áfram og bætir því við að skönnuninni sem hann ræðir um hafi verið beitt í Noregi með góðum árangri.

„Þar eru fyrirtæki sem hafa komið að þessu og eru tilbúin að gera þetta og fara hratt og vel í það. Auðvitað ber Fiskistofa ábyrgð á þessu og það er hún sem myndi framkvæma þetta. Svo eru það veiðiréttarhafar sem meta hvort þeir vilji láta gera þetta,“ segir framkvæmdastjórinn enn fremur.

Frétt af mbl.is

Meintir „Patreksfirðingar“ veiðast víða

Vonandi á allra næstu dögum

Segir hann skönnunina geta lágmarkað tjón veiðréttarhafanna, „ég held að Fiskistofa hafi rætt þetta við Landssamband veiðiréttarhafa í dag og ég held að það sé bara verið að bíða eftir svörum frá þeim um hvað þeir vilji gera. Maður skyldi nú ætla að þeir myndu vilja framkvæma þetta svo menn verða vonandi komnir af stað í þetta á allra næstu dögum,“ segir Daníel Jakobsson að lokum.

Arctic Fish kveðst í fréttatilkynningu harma að eldislax hafi sloppið úr kvíum fyrirtækisins í Patreksfirði.

„Þetta er mikið áhyggjuefni fyrir okkur. Þess vegna höfum við gripið til aðgerða til að draga úr mögulegum neikvæðum áhrifum af sleppingunni. Við teljum okkur vita hvernig götin mynduðust og vinnum nú að því að tryggja að þetta gerist ekki aftur,“ segir þar meðal annars.