Morgunblaðið | 5.10.2023 | 12:35

Á leynilegu stefnumóti í Lundúnum

Alex Scott og Jess Glynne eru sagðar vera að stinga saman nefjum. Samsett mynd

Knattspyrnustjarnan Alex Scott og söngkonan Jess Glynne eru sagðar hafa verið að stinga saman nefjum undanfarna mánuði.

Myndir náðust af Scott og Glynne á stefnumóti í Lundúnum á dögunum, en heimildir Daily Mail herma að þær séu afar hamingjusamar og hafi viljað halda sambandinu fjarri sviðsljósinu til að byrja með.

Vildu ekki flýta sér í sambandinu

Scott og Glynne mættu báðar á frumsýningu Netflix heimildarmyndar Beckham-fjölskyldunnar síðastliðið þriðjudagskvöld en stilltu sér ekki upp saman á mynd. Heimildarmaður Sun segir þær hafa farið hægt af stað í sambandinu, en þær hafi ekki viljað flýta sér né opinbera sambandið of snemma.

„En þær eru par núna og virðast mjög ánægðar. Þær eru báðar sterkar, sjálfstæðar konur með sameiginlega ástríðu og virðingu fyrir starfsferli sínum og styðja hvor aðra frá hliðarlínunni,“ útskýrði heimildarmaðurinn.