Morgunblaðið | 5.10.2023 | 9:21

Opnar sig um viðbjóðslega hluti úr hjónabandinu

Mel B er hamingjusöm með unnusta sinn Rory McPhee. FRAZER HARRISON

Fyrrverandi Kryddpían Mel B er hamingjusöm með unnusta sinn Rory McPhee, en hún segist aldrei hafa upplifað jafn mikið sjálfsöryggi og með honum. Þá segir hún fyrrverandi eiginmann sinn hafa kallað sig ljótum og særandi nöfnum.

„Þetta hefur tekið mig mörg ár, en ég er öruggari með sjálfa mig en nokkru sinni fyrr núna og ég er með maka sem segir mér að hann elski mig og segir að ég sé falleg á hverjum degi,“ sagði söngkonan í viðtali við Sun.

Mel B og McPhee trúlofuðust í október 2022, en hún segir unnusta sinn hafa gengt stóru hlutverki í að endurbyggja sjálfsálit hennar. „Að vera með manni sem elskar mig, vera með fjölskyldunni minni, eiga trausta og ástríka vini – það hjálpar allt,“ bætti hún við.

„Þú sérð spegilmynd af því sem þér er sagt“

Í viðtalinu talar hún einnig hreinskilnislega um erfiða hluti úr fyrra hjónabandi hennar og kvikmyndaframleiðandans Stephen Belafonte, en þau voru gift á árunum 2007 til 2017. Hún hefur áður sagt frá hræðilegum hlutum úr hjónabandi þeirra, en árið 2017 opnaði hún sig fyrst um hrottalegt heimilisofbeldi sem hún varð fyrir af hálfu Belafonte.

Frétt af mbl.is

Hlýtur heiðursverðlaun eftir heimilisofbeldið

„Hann sagði: „Þú lítur út fyrir að vera gömul,“ „þú lítur út fyrir að vera feit,“ „Guð, þú ert svo ljót,“ „handleggirnir þínir eru slappir“ viku eftir viku. Á vissan hátt eru þessi ummæli eins og rigning. Þau síast beint inn í þig, þau skola í burt sjálfstraustinu, sjálfsvitund þinni og þegar þú lítur í spegil sérðu ekki sterka, hamingjusama konu – þú sérð spegilmynd af því sem þér er sagt, „feit, ljót, gömul ... einskis virði“,“ rifjaði söngkonan upp.

Þrátt fyrir að hafa verið áberandi í sviðsljósinu frá því hún skaust á stjörnuhimininn með Kryddpíunum á tíunda áratugnum og fengið allskonar misfalleg ummæli segist hún ekki hafa verið tilbúin fyrir gagnrýni Belafonte á líkamlegt útlit sitt.

Með þykkan skráp úr sviðsljósinu

„Ég hef verið í augum almennings frá því ég var unglingur svo maður fær þykkan skráp þegar fólk kemur með viðbjóðsleg ummæli,“ sagði hún. „Munurinn er þegar einhver sem þú ert giftur, einhver sem er ætlað að elska, virða og meta þig, einhver sem þú deilir heimili og lífi með, byrjar að rífa þig niður. Þá er það mjög, mjög öðruvísi.“

Mel B hefur áður talað um hryllilega hluti sem áttu sér stað í hjónabandinu, en árið 2017 opnaði hún sig um hrottalegt heimilisofbeldi sem hún varð fyrir af hálfu Belafonte

Fram kemur á vef Page Six að Belafonte hafi neitað ásökunum um andlegt og líkamlegt ofbeldi.