Fundur hafinn á Þingvöllum
Setja bókamerki
„Það er ríkisráðsfundur á morgun þannig í síðasta lagi þá, kannski fyrr,“ segir Sigurður Ingi Jóhannsson, innviðaráðherra og formaður Framsóknarflokksins, spurður hvenær vænta megi fregna um mögulegar breytingar á ráðherraembættum vegna afsagnar Bjarna Benediktssonar fjármálaráðherra.
Getgátur hafa verið uppi um að Bjarni og Þórdís Kolbrún R. Gylfadóttir utanríkisráðherra muni eiga stólaskipti. Þá er einnig möguleiki á að umfangsmeiri breytingar verði á ráðherraskipan. Ekkert hefur verið staðfest í þeim efnum.
Verkefnin aðeins öðruvísi
Fundur stjórnarflokkanna á Þingvöllum hófst fyrir skömmu. Rúta var leigð undir ráðherrana og þingmenn flokkanna sem rann í hlaðið rétt fyrir klukkan 12.
Fundurinn var skipulagður fyrir mörgum mánuðum en samkvæmt heimildum mbl.is og Morgunblaðsins verða þar tekin fyrir málefni sem hafa verið rædd í starfshópum, einkum mál sem hafa borið í milli í áherslum flokkanna. Má þar nefna útlendingamál og orkumál, en einkum verður staða efnahagsmála, aðgerðir til að vinna bug á verðbólgu og húsnæðismál til umfjöllunar.
„Kannski eru verkefnin aðeins öðruvísi en þau voru fyrir stuttu,“ segir Sigurður Ingi spurður um dagskrá fundarins.
Hvað búist þið við að fá út úr þessum fundi?
„Við skulum sjá í lok dags.“
