Morgunblaðið | 15.10.2023 | 13:30 | Uppfært 16.10.2023 8:16

Ótvírætt að fiskeldinu hafi fylgt bætt lífsgæði

Þórdís Sif Sigurðardóttir, bæjarstjóri Vesturbyggðar kveðst ekki vilja hugsa til þess hvernig ástandið væri á sunnanverðum Vestfjörðum án fiskeldisins.

Mikill viðsnúningur hefur orðið í byggðum á sunnanverðum Vestfjörðum með tilkomu fiskeldisins sem nú er burðarás í atvinnulífi svæðisins. Þórdís Sif Sigurðardóttir bæjarstjóri Vesturbyggðar segir í síðasta blaði 200 mílna meirihluta fjölskyldna í sveitarfélaginu eiga hagsmuni sem tengjast fiskeldinu og jafnvel byggðin öll ef litið er til óbeinna áhrifa. Það standi þó ekki í vegi fyrir að skýrar reglur verði settar um starfsemina.

„Eitt er að horfa á beinu störfin, en þau áhrif sem fiskeldi hefur haft á fjölda óbeinna starfa og áhrif þess á rekstrargrundvöll annarra fyrirtækja, verslunar og þjónustu er annað. Fjöldi fólks á sunnanverðum Vestfjörðum á lífsviðurværi sitt undir atvinnugreininni og atvinnugreinin hefur óbeint orðið til þess að lífsgæði hér hafa aukist,“ segir Þórdís Sif.

Hún bendir á að mikil fólksfjölgun hafi átt sér stað í byggðakjörnum sveitarfélagsins á undanförnum fimm árum, frá því að rekstur fiskeldisfyrirtækjanna hófst af alvöru. „Frá 1983 til um það bil 2010 var mikil fólksfækkun og íbúar upplifðu sig svolítið fasta, það var erfitt að stíga út úr ástandinu því það var lítið um atvinnu og fasteignaverð mjög lágt.“

„Það eru dæmi um að fasteignamat sé búið að hækka um 400% frá árinu 2011.“

Fiskeldið hefur haft jákvæð áhrif á atvinnutækifærin á sunnanverðum Vestfjörðum. Ljósmynd/Icelandic Salmon

Erfið umræða

Þórdís Sif segir umræðuna sem nú er uppi í íslensku samfélagi í tengslum við strokulaxa úr Patreksfirði mjög erfiða. „Það eru mikil mótmæli og greinin mætir mikilli andstöðu. Íbúar Vesturbyggðar eru ekki endilega afgerandi með eða á móti fiskeldi en sjá hve jákvæð áhrif það hefur haft á samfélagið hér fyrir vestan. Sunnanverðir Vestfirðir væru ekki það sem þeir eru í dag ef ekki væri fyrir fiskeldið, mig langar ekki einu sinni að hugsa til þess hvert ástandið væri.“

Á sama tíma óttast íbúar Vesturbyggðar ekki að sett séu þröng skilyrði hvað varðar umhverfisþætti og fiskeldið. „Þetta skiptir okkur einnig miklu máli. Við viljum að á svæðinu séu rannsóknar- og eftirlitsstörf því það er mikilvægt fyrir umhverfið að slíkt sé unnið í nánd við greinina. Við erum að stofna rannsókna- og þróunarsetur fiskeldis fyrir sunnanverða Vestfirði hér á Patreksfirði. Markmiðið er að skapa vinnuaðstæður og samfélag fyrir sérfræðinga í eftirliti og rannsóknum er tengjast fiskeldi, þar sem gerðar eru rannsóknir á umhverfisþáttum, lífríki sjávar sem og félagslegar rannsóknir.“

Ítarlegt viðtal við Þórdísi Sif má lesa í síðasta blaði 200 mílna.