Morgunblaðið | 29.10.2023 | 9:49

Laxinn vex 19% hraðar við rétt skilyrði

„Með hárréttu súrefnishlutfalli og réttum straumhraða má bæði minnka fóðurnotkun og hámarka vöxtinn á fiskinum,“ segir Alda. Búnaður Linde tekur inn súrefni af sama hreinleika og sjúkrahús nota. mbl.is/Eggert Jóhannesson

Að tryggja súrefnisgæði í fiskeldi á landi getur verið flókin áskorun, og ef súrefnisgjöfin er ekki nógu góð má reikna með að fiskurinn vaxi hægar og ýmsir kvillar komi upp.

Alda Hlín Karlsdóttir er sölustjóri á fiskeldissviði Linde en félagið er umsvifamikið í þróun súrefnislausna fyrir fiskeldi. Linde er alþjóðlegt stórfyrirtæki á gasmarkaði, með um 70.000 starfsmenn á heimsvísu, en árið 1993 hóf félagið að þróa búnað til að koma súrefni á sem skilvirkastan hátt inn í fiskeldisker og smíðar í dag búnaðinn SOLVOX sem býður upp á alhliða lausn til að leysa upp súrefni í vatni og skapa þann vatnsstraum og hringrás sem fiskurinn þarf til að vaxa og dafna.

Fullkomin landeldisstöð Blue Salmon AS í Noregi þar sem notast er við tækni frá Linde. Ljósmynd/Linde

Straumflæði í kerjum leikur mikilvægt hlutverk í að skapa sem náttúrulegastar aðstæður fyrir laxinn. SOLVOX-einingarnar eru hannaðar til að tryggja þessar aðstæður með vökvastýringu og besta mögulega straumhraða. „Með hárréttu súrefnishlutfalli og réttum straumhraða má bæði minnka fóðurnotkun og hámarka vöxtinn á fiskinum, auk þess að fiskurinn verður heilbrigðari, með öflugra ónæmiskerfi, og betur í stakk búinn til að ráða við að vera t.d. fluttur úr ferskvatnskerjum út í sjókvíar til áframeldis,“ segir Alda.

Hafa rannsóknir Linde sýnt að með réttum búnaði og stillingum getur eldislax vaxið 19% hraðar og nýting á fóðri batnað um allt að 21% á sama tíma. Gefur augaleið að fiskeldisstöðvar geta þannig stóraukið skilvirkni og skapað meiri verðmæti með minni tilkostnaði.

Viðtalið við Öldu Hlín má lesa í síðasta blaði 200 mílna.