Morgunblaðið | 10.11.2023 | 6:00

Arnarlax sýknaður í máli gegn Vesturbyggð

Sjókvíaeldi á vegum Arnarlax. Ljósmynd/Icelandic Salmon

Laxeldisfyrirtækið Arnarlax var í gær, fimmudag, í Héraðsdómi Vestfjarða sýknað af kröfum Vesturbyggðar á hendur fyrirtækinu og innheimta aflagjalda af eldisfiski þar talin ólögmæt.

Taldi dómurinn eldisfisk ekki til sjávarafla og væri því ekki lagastoð fyrir álagningu aflagjalds af fiski sem landað er úr sjókvíaeldi.

Hafnagjöld, og aflagjöld þar með talin, eru grunnforsenda uppbyggingar hafna landsins og er samkvæmt þeim lagaramma, sem höfnum er settur, eina færa leiðin til að innheimta gjöld af þeim eldisfiski sem fer um hafnirnar.

Víðtæk áhrif á öll sveitarfélög

Samkvæmt tilkynningu frá Vesturbyggð hefur dómurinn ekki aðeins áhrif á það sveitarfélag heldur víðtæk áhrif á öll sveitarfélög þar sem fiskeldi er stundað í sjókvíum. Vesturbyggð hyggst áfrýja dóminum.

Ísfirska héraðsfréttablaðið Bæjarins besta greindi frá stefnu Vesturbyggðar á hendur Arnarlaxi í júní vegna áðurnefnds ógreidds hluta aflagjalds sem Arnarlax neitaði að greiða.

Sagði í umfjöllun blaðsins að Vesturbyggð hefði lagt stefnuna fram vegna ágreinings um hækkun aflagjalda af lönduðum eldisfiski. Blaðið greindi enn fremur frá því í apríl í fyrra að ágreiningurinn sprytti af því að sveitarfélagið hefði hækkað gjaldið úr 0,6 í 0,7 prósent af aflaverðmæti en þessu mótmælti Arnarlax.

Tálknafjarðarhreppur höfðaði að sögn BB einnig mál á hendur Arnarlaxi vegna vörugjalda af annars vegar flutningi á fóðri í pramma og hins vegar á dauðum laxi sem landað var í Tálknafjarðarhöfn. Var málinu vísað frá dómi í janúar 2022 þar sem ekki var vísað til þess í stefnunni hver lagagrundvöllur kröfunnar væri.