Morgunblaðið | 22.11.2023 | 11:41

Tæp 70% andvíg sjókvíaeldi

Tæplega 70% segjast mótfallin sjókvíaeldi við Ísland. mbl.is/Helgi Bjarnason

Alls sögðust 69% svarenda í skoðanakönnun Maskínu í nóvember sögðust vera andvígir sjókvíaeldi við Ísland og aðeins 10% hlynntir. Hefur hlutfall þeirra sem eru andvígir sjókvíaeldi aukist um tólf prósentustig frá könnun Maskínu í mars og hlutfall hlynntra dregist saman um þriðjung eða fimm prósentustig.

Frá árinu 2021 hefur hlutfall hlynntra meira en helmingast og hlutfall andvígra aukist um meira en 20 prósentustig.

Þetta rímar vel við þá þróun sem hefur átt sér stað undanfarin misseri ekki síst í kjöfar þess að nokkur þúsund laxar sluppu úr sjókví Arctic Fish í Patreksfirði í ágúst. Niðurstöður könnunar Gallup sem kynntar voru í byrjun október gáfu til kynna að meira en helmingur landsmanna vilja banna laxeldi í opnum sjókvíum.

Frétt af mbl.is

Meirihluti segist vilja banna eldi í opnum kvíum

Samkvæmt könnun Maskínu virðast Íslendingar vera mun jákvæðari gagnvart landeldi þó stuðningurinn hafi dvínað á undanförnum tveimur árum og sögðust 47% svarenda hlynntir slíku laxeldi í síðustu könnun Maskínu á móti 55% sem sögðu hið sama í ágúst 2021. Þá segjast 26% andvígir landeldi nú og er það næstum því tvöfalt fleiri en fyrir tveimur árum.

Fram kemur á vef Maskínu að könnunin fór fram 3. til 7. nóvember og voru svarendur 937. „Könnunin var lögð fyrir Þjóðgátt Maskínu, sem er þjóðhópur fólks (e.panel) sem dreginn er með tilviljun úr Þjóðskrá, á netinu. Svarendur eru alls staðar að af landinu og á aldrinum 18 ára og eldri. Svör voru vegin samkvæmt mannfjöldatölum Hagstofunnar um kyn, aldur, búsetu og menntun, þannig að þau endurspegla þjóðina prýðilega.“