Morgunblaðið | 19.12.2023 | 18:30

Skipstjórinn á Geir lætur vel af aflabrögðunum

Áhöfn Geirs gaf sér tíma til að líta upp frá jólahreingerningu á bátnum og spjalla við blaðamann. Feðgarnir Jóhann H. Jónasson og Jónas Jóhannsson útgerðarmaður og eigandi Geirs ásamt hluta áhafnarinnar, sem stendur á milli þeirra: F.v. Sigfús Kristjánsson, Jón Hafliðason, Jón Marinósson og Björgvin Grant. mbl.is/Líney Sigurðardóttir

Jólahreingerning stóð sem hæst um borð í Geir ÞH-150 um síðustu mánaðamót þegar blaðamann bar að garði og var þar ekki ódurturinn á. Karlarnir voru á kafi í þrifum og eigandi útgerðarinnar, Jónas Jóhannsson, lét ekki sitt eftir liggja í frágangi. Geirinn var rétt kominn úr síðasta túr ársins og áhöfnin því á leið í frí að loknum þrifum. Jónas er ánægður með mannskap sinn og segir þá alla trausta afbragðssjómenn, að því er fram kom í síðasta blaði 200 mílna.

Sigurður R. Kristinsson er skipstjóri á Geir og lætur vel af aflabrögðum ársins: „Þetta var ágætis ár, eiginlega metár í afla þótt aflaverðmætið hafi verið ögn minna en í fyrra,“ sagði Sigurður og er nokkuð ánægður með árið, heildarafli ársins var um 1.850 tonn upp úr sjó, blandaður afli.

Sigurður hefur nánast alla starfsævina verið um borð í Geir, rúm þrjátíu ár, en starfsaldur meirihluta áhafnarinnar er langur sem segir sitt um útgerðina en í áhöfn eru sex til sjö menn. „Ég tel það forréttindi að vinna hjá einni af síðustu fjölskylduútgerðum landsins, rótgrónu heimafólki, og öllum fiski er landað á hæsta mögulega verði og vel hugsað um mannskap á allan hátt,“ sagði Sigurður, sáttur um borð í Geirnum.

Eitt stærsta þorskhol ársins var hjá Geir í byrjun apríl, rúm 50 tonn í dragnót í Þistilfirðinum. Ljósmynd/Sigurður R. Kristinsson

Þetta er fimmta skipið í sögu Geirsútgerðarinnar sem ber nafnið Geir. Hann kom nýsmíðaður í heimahöfn árið 2000, 115 tonna dragnóta- og netaveiðiskip og áhöfnin kallar skipið enn „nýja Geirinn“.

Sigurður segir dragnótina aðalveiðarfærið, netavertíð hefur styst undanfarin ár en er helst í febrúar og mars. „Við vorum í haust á Skjálfandaflóa og Eyjafirði en í sumar við Seyðisfjörð og suður undir Hornafirði og Lónsbugt,“ sagði Sigurður.

Geirfuglarnir, eins og þeir eru oft nefndir hér í heimahögunum, halda svo á netaveiðar í Þistilfirði í febrúar og svo væntanlega á dragnót í lok mars.

Skötuveisla og jólahlaðborð

Jólahefðirnar eru árvissar á Geirnum og er skötuveislan ein af þeim. „Við kæsum tindaskötu sjálfir um borð og síðan er haldin dýrðleg skötuveisla skömmu fyrir jól í útgerðarhúsi Geirs, þar sem skatan er aðalréttur auk ýmiss góðgætis og guðaveiga. Skatan fer beint í hendur Jónasar útgerðarmanns sem hefur það leiðindahlutverk að roðrífa hana með naglbít og undirbúa í pottinn,“ sagði Sigurður Ragnar. Jólahlaðborð er líka í boði útgerðarinnar ásamt hótelgistingu en Akureyri varð fyrir valinu í þetta sinn og áhöfnin dvelur þar um helgina ásamt mökum.