Morgunblaðið | 29.12.2023 | 10:10

Velgengnin byggð á góðri umgjörð

„ Á Íslandi eru flest störf í sjávarútvegi heilsársstörf, ólíkt því sem þekkist í mörgum nágrannalöndum okkar þar sem algengt er að vinna í kringum fiskveiðar og -vinnslu sé árstíðabundin, “ segir Hrefna Karlsdóttir þegar hún gefur dæmi um ávinninginn af skipulagi íslenskra fiskveiða. mbl.is/Eggert Jóhannesson

Íslendingum þykir hafa tekist að skapa einkar góða lagalega umgjörð utan um fiskveiðar og segir Hrefna Karlsdóttir í viðtali í desemberblaði 200 mílna að með innleiðingu aflamarkskerfisins og framsali á sínum tíma hafi stjórnvöld lagt grunninn að uppbyggingu og velgengni íslensks sjávarútvegs. „Það er eðlilegt að reglurnar séu landsmönnum hugleiknar og viðbúið að í áranna rás séu gerðar ýmsar minni háttar breytingar og betrumbætur á kerfinu, en brýnt er að missa ekki sjónar á því hversu mikilvægt það er fyrir sjávarútveginn, og um leið fyrir hagsæld í landinu, að sem mestur stöðugleiki og fyrirsjáanleiki sé til staðar.“

Hrefna er með doktorsgráðu í hagsögu frá Gautaborgarháskóla en þar rannsakaði hún fyrstu samningaviðræðurnar sem gerðar voru á á vettvangi Norðaustur-Atlantshafsfiskveiðinefndarinnar (NEAFC). Frá árinu 2017 hefur Hrefna starfað sem sérfræðingur hjá SFS þar sem hún vinnur einkum að málum er varða fiskveiðistjórnun og samninga við erlend ríki, en hún var áður hjá Hagstofu Íslands, atvinnu- og nýsköpunarráðuneytinu og Fiskistofu.

„Við búum í dag við kerfi sem stuðlar að sjálfbærri nýtingu og skapar hvata til að hámarka þau verðmæti sem hægt er að gera úr takmarkaðri en endurnýjanlegri auðlind. Íslenskum sjávarútvegsfyrirtækjum gengur vel að selja afurðir á erlendum mörkuðum þrátt fyrir mjög harða samkeppni, og það er brýnt að skilja að árangur greinarinnar er ekki eitthvað sem gerðist af sjálfu sér, heldur er hann afrakstur langtímaþróunar sem hófst á 9. áratugnum,“ útskýrir Hrefna.

Viðtalið má lesa í heild sinni í desemberblaði 200 mílna.