Morgunblaðið | 25.1.2024 | 7:10 | Uppfært 17:09

„Þetta er áfall fyrir okkur“

Sigurgeir B. Kristgeirsson, framkvæmdastjóri Vinnslustöðvarinnar, telur líklegt að loðna finnist í febrúar en að vertíðin verður lítil. mbl.is/Óskar Pétur Friðriksson.

Fátt bendir til þess að loðnuvertíð verði í vetur þar sem lítið mældist af loðnu í vetrarleiðangri Hafrannsóknastofnunar.

Mikið er í húfi en hefðbundin loðnuvertíð gæti skilað 20 til 40 milljörðum í útflutningsverðmæti. Stefnt er að því að halda til mælinga á ný í febrúar, en lítil vertíð gæti þýtt að aðeins erlendum skipum verði úthlutað kvóta.

Frétt af mbl.is

Leggja til engar loðnuveiðar

„Ég held að það finnist loðna“

„Það er auðvitað ekki gott að lítið hafi fundist, en í fyrra kom loðnugangan mjög seint. Ég held að það finnist loðna en það er vont þegar það gerist seint,“ segir Sigurgeir B. Kristgeirsson, framkvæmdastjóri Vinnslustöðvarinnar, um niðurstöðu mælinga Hafrannsóknastofnunar 16. til 23. janúar.

„Það eru langmestar líkur á að þetta verði lítill kvóti og þá fer töluvert til annarra þjóða, sérstaklega til Norðmanna. Þetta er áfall fyrir okkur,“ segir Sigurgeir. Samkvæmt fiskveiðisamningum Íslendinga við Grænlendinga, Norðmenn og Færeyinga fara töluverðar heimildir til þessara ríkja, sérstaklega Norðmanna.

Það þarf því að gefa út loðnukvóta umfram tæp 39 þúsund tonn áður en Íslendingar byrja að fá hlutdeild í veiðunum. Bendir Sigurgeir þó á að einn samninganna sem um ræðir renni út síðar á þessu ári.

Frétt af mbl.is

Þarf nokkuð til að Íslendingar fái loðnukvóta

Ávallt viðbúin vertíð

Óháð því hvaða vísbendingar komu úr fyrri mælingum á loðnustofninum þarf alltaf að gera allt klárt fyrir vertíð, útskýrir hann, enda dýrt að geta ekki hafið veiðar um leið og færi gefst.

Spurður hvort loðnubrestur eða jafnvel það að vertíðin verði lítil hafi mikil áhrif, svarar hann því játandi.

„Auðvitað hefur þetta hellings áhrif. Áhrif á vaktir og þar með tekjur fólks. Þetta hefur mikil áhrif í öllum þeim sveitarfélögum þar sem loðnan er fyrirferðarmikil eins og í Vestmannaeyjum og á Austfjörðum.“

Lesa má nánar um málið í Morgunblaðinu í dag.

Uppfært 25.01 klukkan 17:08: upphaflega sagði að Smugusamningurinn myndi renna út undir lok þessa árs, en það eru samningar um hlutdeildir ríkja í loðnuveiðum sem rennur út. Fréttin hefur verið uppfærð mwð tilliti til þess.