Morgunblaðið | 6.3.2024 | 15:29

Heimilt að gera hlé og geyma veiðidaga

Grásleppusjómönnum er heimilt að gera hlé og geyma veiðidaga fram yfir 20. mars. mbl.is/Eggert Jóhannesson

Grásleppubátar sem hefja veiðar á tímabilinu 1. til 20. mars mega gera hlé á veiðum og geyma veiðidaga sína þar til hefðbundið veiðitímabil tekur við eftir 20. mars. Hefjast þá samfelldir veiðidagar að frádregnum þeim dögum sem þegar hafa verið notaðir.

Þetta kemur fram í tilkynningu á vef Fiskistofu.

„Þeir aðilar sem ætla að nýta sér heimildina tilkynna hléið ásamt staðfestingu á að öll net hafi verið dregin upp,“ segir í tilkynningu stofnunarinnar.

Í lok febrúar var tilkynnt um að ný reglugerð hefði verið sett um grásleppuveiðar og að veiðitímabilinu yrði flýtt frá 20. mars til 1. mars. Er veiði á þessu tímabili háð ýmsum nýjum reglum um tilhögun veiða og felur reglugerðin í sér m.a. fyrrnefnda heimild til að gera hlé á veiðum.