Morgunblaðið | 21.3.2024 | 11:11

Engu svarað um áhrif lúsalyfja

Laxalús getur verið þrálátt vandamál í sjókvíaeldi og eru nokkrar tegundir lyfja notaðar í fóðri eða með böðun til að losna við hana. Ljósmynd/Havforskningsinstituttet

Umhverfisstofnun svarar því ekki hvenær standi til að skoða hver áhrif lyfja sem beitt er til að meðhöndla eldislax gegn laxalús eru á lífríki sjávar. Ekki hafa heldur fengist svör við spurningu um það hvort stofnunin telji forsvaranlegt að lyfin séu í notkun á meðan áhrif þeirra á lífríki í þeim fjörðum þar sem þau eru notuð eru óþekkt, að því er fram kemur í umfjöllun Morgunblaðsins.

Í umfjöllun Morgunblaðsins í janúar 2022 um notkun lyfja gegn laxalús í sjókvíaeldi upplýsti Umhverfisstofnun að hún hygðist taka til skoðunar notkun fiskilúsalyfja, nánar tiltekið emamectins, vegna mögulegra skaðlegra áhrifa á umhverfið. Eru nú liðin tvö ár og hefur skoðunin enn ekki farið fram. Hversu lengi málinu verður frestað hefur ekki fengist upplýst.

Frétt af mbl.is

Laxalúsarlyf til skoðunar hjá Umhverfisstofnun

Um mitt síðasta ár gerði blaðamaður tilraun til að fá svar við fyrrnefndum spurningum og svaraði Umhverfisstofnun þá: „Vegna mikilla anna og annarra verkefna hefur því miður ekki verið lokið við þetta verkefni. Í ljósi boðaðrar stefnumótunar matvælaráðuneytisins í lagareldi mun stofnunin skoða málið heildstætt með öðrum stofnunum sem koma að fiskeldismálum.“

Stefnumótun yfirvalda fyrir eldis- og ræktunargreinar lauk á síðasta ári með kynningu frumvarps að nýjum heildarlögum fyrir lagareldi. Til stóð að flytja frumvarpið fyrir Alþingi 26. febrúar síðastliðinn samkvæmt þingmálaskrá ríkisstjórnarinnar. Ekki er vitað hvenær megi búast við því að það hljóti þinglega meðferð.

Nánar er fjallað um notkun lyfja gegn laxalús í Morgunblaðinu í dag.