Spursmálaþáttur vikunnar verður helgaður yfirvofandi forsetakosningum þar sem kafað verður ofan í kjölinn á þeirri fordæmalausu stöðu sem nú er komin upp í íslenskum stjórnmálum.
Þau Jón Gunnarsson, þingmaður Sjálfstæðisflokksins og fyrrverandi dómsmálaráðherra, Heiða Kristín Helgadóttir, sem situr í kosningastjórn hjá Jóni Gnarr, og Snorri Másson, ritstjóri Ritstjóra, mæta í settið til að ræða möguleg næstu útspil og hvers sé að vænta miðað við stöðuna sem nú er yfirstandandi.
Hugsanlegt forsetaframboð Katrínar Jakobsdóttir núverandi forsætisráðherra hefur valdið þó nokkrum úlfaþyt síðustu daga og framhald ríkisstjórnarsamstarfsins alls kostar óljóst. Kann það að auka líkurnar á að möguleg stjórnarkreppa sé í kortunum því óhjákvæmilega þyrfti að gera breytingar á ráðherraskipan og erfiðlega gæti gengið að mynda nýja stjórn undir forystu nýs forsætisráðherra.
Stórtíðinda er að vænta frá Katrínu um ákvörðun hennar til hugsanlegs framboðs. Segir hún von á tilkynningu þess í allra náinni framtíð en hún hefur sagst íhuga það af fullri alvöru að gefa kost á sér til embættis forseta Íslands.