Morgunblaðið | 11.4.2024 | 12:07

Unnið hörðum höndum í nýjum Hákoni

Nýr Hákon ÞH ætlar að verða stórmyndarlegt uppsjávarskip. Skipið er smíðað fyrir Gjögur. Ljósmynd/Karstensens Skibsværft A/S

Danska skipasmíðastöðin Karstensens Skibsværft A/S birti á dögunum myndir af þremur uppsjávarskipum sem hafa verið í smíðum hjá stöðinni og mátti sjá stórmyndarleg nýsmíði Gjögurs, nýjan Hákon ÞH. Stóð skipið milli tveggja uppsjávarskipa sem smíðuð eru fyrir Færeyinga, nýr Finnur Fríði og nýtt Høgaberg.

Hákon var sjósettur í Póllandi í október og hefur í vetur verið unnið hörðum höndum um borð, en nokkuð er í að skipið verði klárt til afhendingar.

Frétt af mbl.is

Sjósettu nýjan Hákon ÞH í Póllandi

Hákon ÞH er 75,4 metra að lengd, 16,5 metra að breidd og eru brúttótonnin 2.900. Skipið mun geta hýst 15 manna áhöfn.

Um borð er 5.200 kW aðalvél frá Wartsila tengd d4000mm gír frá sama framleiðanda. Þá eru tvær Caterpillar ljósvélar af gerðinni C32 sem gefur 940 kWe og C18 sem gefur 550 kWe. Vindur og kranar eru frá Sea Quest og frystikerfi frá FrioNordica.