Morgunblaðið | 13.4.2024 | 15:15

Grafalvarlegt að Hvalur hf. bíði enn svara

Vilhjálmur Birgisson, formaður Verkalýðsfélags Akraness. Samsett mynd

Vilhjálmur Birgisson, formaður verkalýðsfélags Akraness, segir það grafalvarlegt að Hvalur hf. bíði enn eftir svörum frá matvælaráðherra við umsókn um leyfi til veiða á langreyðum.

Hann sakar Sjálfstæðisflokkinn og Framsókn um að standa ekki vörð um atvinnufrelsi fyrirtækisins.

Það eru litlar líkur á hvalveiðum í sumar ef svör fást ekki von bráðar, að sögn Hvals.

Vilhjálmur segir við mbl.is að nærsamfélaginu, auk fyrirtækja sem þjónusta hvalveiðifyrirtækið, muni mikið um að þessi starfsemi fái að halda áfram í sumar, „svo ekki sé talað um mína félagsmenn sem hafa haft mjög góðar tekjur þegar vertíðin er að eiga sér stað, mánaðalaun sem nema yfir 2 milljónum.“

Frétt af mbl.is

Útséð um hvalveiðar í sumar

3 milljarðar á ári

„Þetta er grafalvarlegt mál í mínum huga,“ segir hann. „Það kom nú bara fram frá hagstofunni á dögunum að útflutningsverðmæti hvalaafurða fyrir árið 2022 voru tæpir 3 milljarðar.“

Því varpar verkalýðsforinginn fram spurningu til valdhafa þjóðarinnar: „Munar íslenskri þjóð ekki um útflutningstekjur sem nemur 3 milljörðum króna?“

Frétt af mbl.is

Nýju fólki fylgi nýjar áherslur

Sjálfstæðismenn og Framsókn standi ekki sína plikt

Þá beinir Vilhjálmur spjótum sínum að Sjálfstæðisflokknum og Framsókn:

„Það er með ólíkindum að flokkar sem kenna sig við frelsi skuli ekki stand vörð um grundvallar lagagrein í stjórnarskránni sem er atvinnufrelsi fyrirtækja og einstaklinga.“

Hann heldur áfram:

„Það liggur fyrir að báðir þessir flokkar hafa verið fylgjandi því að við nýtum okkar auðlindir, nýtum hvalaafurðir að höfðu samráði við veiðiráðgjöf frá hafrannsóknarstofnum. Því er það með ólíkindum að þessir tveir flokkar skuli ekki hafa tryggt það með afgerandi hætti í nýjum málefnasamningi að veiðarnar myndu hefjast.“

Frétt af mbl.is

Hvalavinir vilja að Ísland segi sig úr NAMMCO

Hvalur að falla á tíma

Kristján Loftsson sagði í samtali við Morgunblaðið að hann væri að falla á tíma. Vilhjálmur segist vita það fyrir víst að Hvalur hf. var byrjaður í byrjun apríl í fyrra að ráða til sín starfsfólk, en Kristján segist ekki geta gengið í mannaráðningar fyrr en búið sé að samþykkja veiðileyfið.

„Nú er bara mikilvægt að stjórnvöld svari því með afgerandi hætti hvort þau ætli að uppfylla lög og heimila veiðarnar eða ekki. Eða hvort menn ætli að halda áfram að gerast lögbrjótar og brjóta hér á grundvallarréttindum fyrirtækja og einstaklinga til atvinnusköpunar,“ segir Vilhjálmur að síðustu.

Í fyrrasumar setti Svandís Svavarsdóttir á tímabundið hvalveiðibann. Seinna komst umboðsmaður Alþingis að þeirri niðurstöðu að bannið ætti sér ekki skýra stoð í lögum.