Morgunblaðið | 17.4.2024 | 13:32

Samfélagsspor Síldarvinnslunnar yfir 10 milljarðar

Rekstur Síldarvinnslunnar er umsvifamikill og var samfélagsspor samstæðunnar meira en tíu milljarðar króna á síðasta ári. Ljósmynd/Síldarvinnslan: Þorgeir Baldursson

Samfélagsspor starfsemi Síldarvinnslunnar nam 10.619 milljónum króna á síðasta ári. Um er að ræða rúmlega 10% stærra samfélagsspor en árið 2022 og tæp 60% stærra en 2021, en það ár er rekstur dótturfélagsins Vísis ekki reiknað með þar sem það var ekki hluti af samstæðunni.

Þetta má lesa úr gögnum sem birt eru í samfélagsskýrslu Síldarvinnslunnar, en með samfélagsspori er átt við öll opinber gjöld og skatta sem greiddir eru til hins opinbera vegna starfsemi félagsins.

Samanlagt greiddi Síldarvinnslan 6.303 milljónir króna í skatta og gjöld á síðasta ári og voru innheimtar 4.316 milljónir af starfsfólki og hluthöfum.