Morgunblaðið | 29.4.2024 | 14:55

Sömdu um sjálfvirkt flutningskerfi í nýjan togbát

Slippurinn Akureyri og Vinnslustöðin handsala hönnunarsamning á sjávarútvegssýningunni í Barcelona, f.v. Ásþór Sigurgeirsson, Sverrir Haraldsson, Magnús Blöndal og Sindri Viðarsson. Ljósmynd/Slippurinn Akureyri

Slippurinn Akureyri sem framleiðir vinnslubúnað undir merkjum „DNG by Slippurinn“ hefur gert hönnunarsamning við Vinnslustöðina í Vestmannaeyjum og verkfræðistofuna Skipasýn, að því er fram kemur í fréttatilkynningu.

Í samningnum felst að Skipasýn, sem fer með hönnun nýs 29 metra togskips fyrir Vinnslustöðina, mun hanna lest skipsins á þann hátt að hægt sé að koma fyrir 250 til 280 kera sjálfvirku flutningskerfi. Þar að auki er hannaður vinnslubúnaður með bestu mögulegu hráefnismeðferð að leiðarljósi.

Frétt af mbl.is

Ætla að smíða tvö ný fiskiskip

„Samstarfið við Vinnslustöðina í Vestmanneyjum og Skipasýn hefur verið mjög gott og það er sérstaklega ánægjulegt fyrir okkur að koma að verkefninu svona á fyrstu stigum hönnunar. Samningurinn er rökrétt framhald af þeirri forvinnu sem hefur átt sér stað í verkefninu undanfarin misseri,“ segir Magnús Blöndal sviðsstjóri Slippsins Akureyri.

Sjálfvirkt lestarkerfi fyrir ferskfiskskip er endurbætt hönnun frá DNG by Slippurinn og stuðlar að bestu mögulegu hráefnismeðferð. Ljósmynd/Slippurinn Akureyri