Morgunblaðið | 20.5.2024 | 13:45 | Uppfært 14:22

Frambjóðendur svara: Halla Hrund Logadóttir

Halla Hrund Logadóttir. mbl.is/Kristinn Magnússon

Halla Hrund Logadóttir, frambjóðandi til embættis forseta Íslands, telur meðal annars reynslu sína og þekkingu af auðlindamálum hér heima og erlendis vera gríðarlega mikilvæga fyrir embætti forseta Íslands. Þá telur hún það vera kost að forseti Íslands sé óháður og komi ekki úr stjórnmálastarfi.

Það mikilvægasta við embætti forseta Íslands að mati Höllu Hrundar er að forsetinn sé öflugur liðsmaður þjóðarinnar allrar. Hún segir að forsetinn þurfi að tala fyrir hagsmunum almennings og vera öflugur talsmaður þjóðarinnar á alþjóðavettvangi.

Morgunblaðið gefur öllum frambjóðendum tækifæri til að svara sjö spurningum og birtir svör hvers fyrir sig á mbl.is. Svörum frambjóðendanna verður síðan safnað og þau birt í Morgunblaðinu svo lesendur geti haganlega borið þau saman.

Íslendingar ganga að kjörborðinu 1. júní og kjósa sér sjöunda forseta lýðveldisins. Morgunblaðið og mbl.is fylgjast vel með og færa ykkur helstu fréttir af kosningabaráttunni.

Hér á eftir fara svör Höllu Hrundar við spurningum mbl.is og Morgunblaðsins:

Halla Hrund er ein þeirra tólf sem bjóða sig fram í embætti forseta Íslands í komandi forsetakosningum. mbl.is/Kristinn Magnússon

Hvað finnst þér mikilvægast við embætti forseta Íslands?

„Forsetaembættið eigum við öll saman og forsetinn á að vera tryggur þjónn þjóðarinnar, í blíðu og stríðu. Mikilvægasta hlutverk forseta Íslands er því að vera öflugur liðsmaður þjóðarinnar allrar. Forsetinn hvetur samlanda sína til dáða, er til staðar og fær aðra til að vaxa og njóta sín. Hann á að tengja ólíka hópa samfélagsins saman og ljá þeim rödd sem minna mega sín. Forseti á einnig að fá okkur til að leggja okkur fram fyrir samfélagið okkar og horfa bjartsýn fram á veginn, en vera til staðar þegar á móti blæs. Forseti þarf að tala fyrir hagsmunum almennings og vera öflugur talsmaður þjóðarinnar á alþjóðavettvangi.“

Hvað hefur þú helst fram að færa til embættisins umfram aðra frambjóðendur?

„Reynsla mín og þekking af auðlindamálum hér heima og erlendis er gríðarlega mikilvæg fyrir embætti forseta Íslands. Ég veit hvaða verðmæti við eigum í auðlindum okkar og náttúru, ég þekki hversu einstakar þær eru á heimsvísu og hvers vegna það skiptir máli að nýta og njóta þeirra af alúð fyrir komandi kynslóðir. Þessi þekking á orku,- auðlinda og loftslagsmálum nýtist vel í alþjóðlegu samhengi enda um lykilmálaflokka að ræða. Reynsla mín af því að byggja upp alþjóðleg verkefni frá grunni er einnig dýrmætt veganesti í embætti forseta. Vegna hennar hef ég skýra sýn á það hvernig forseti Íslands getur stutt við fjölbreytt tækifæri landsins, hvort sem það er í verkefnum tengdum nýsköpun, menningu, listum, íþróttum eða með hvatningu til allra landsmanna. Þá tel ég það kost að forseti Íslands sé óháður og komi ekki úr stjórnmálastarfi. Hins vegar þekki ég stjórnkerfi landsins vel, ekki hvað síst vegna starfs míns sem orkumálastjóri. Þar hef ég sýnt að ég vinn af heilindum með almannahagsmuni að leiðarljósi. Þá afstöðu tel ég vera mikilvægasta áttavita forseta Íslands.“

Á maki forseta að hafa formlega, launaða stöðu?

„Hlutverk maka forseta er hvergi formlega skilgreint og ég tel ekki ástæðu til að breyta því. Aftur á móti getur maki forseta verið öflugur liðsstyrkur fyrir embættið, eins og dæmin hafa sýnt, og þekking og reynsla viðkomandi getur nýst í þágu þjóðarinnar. Eiginmaður minn Kristján Freyr, kemur til að mynda úr nýsköpunargeiranum. Hann þekkir vel til gervigreindar, sem mun hafa mikil áhrif á heiminn allan á komandi árum, meðal annars á Ísland.“

Á forseti að vera virkur þátttakandi í þjóðmálaumræðu?

„Forseti á ekki að taka þátt í pólitískum deilum eða dægurþrasi. Forsetinn á að hlusta á þjóðina og nýta stöðu sína, áhrif og rödd til að vekja athygli á brýnum málum í samfélaginu og stuðla að uppbyggilegri umræðu með langtímasýn og hagsmuni almennings að leiðarljósi. Forseti Íslands á að vera forseti allra landsmanna.“

Hvað vægi þyngst í ákvörðun um að synja lögum staðfestingar: rök stjórnarandstöðu, mótmæli, ráðgjöf eða eigin dómgreind?

„Það sem vegur þyngst þegar kemur að málskotsréttinum er eðli máls. Ég tel að forseti Íslands eigi ekki að beita þessari valdheimild nema í afar sérstökum aðstæðum ef langtímahagsmunir þjóðarinnar eru undir. Við ákvörðun um að synja lögum staðfestingar ætti forsetinn að íhuga öll rök og sjónarmið vandlega. Forsetinn ætti að hlusta á rödd þjóðarinnar, viða að sér upplýsingum um allar hliðar málsins og beita svo eigin dómgreind. Allt eru þetta grundvallaratriði í ákvörðun um að synja lögum staðfestingar.“

Hver eru brýnustu viðfangsefni Íslendinga nú og hvað hefur forseti til þeirra mála að leggja?

„Brýnustu viðfangsefni Íslendinga í mínum huga eru að þétta raðirnar, efla gleði og samkennd okkar á milli og þar með styrk okkar til að sækja fram. Ég finn á ferðum mínum um landið að ákveðnir hópar í samfélaginu upplifa sig afskipta, eru einangraðir og margir glíma við einmanaleika, kvíða og þunglyndi. Samfélagið okkar verður líka sífellt fjölbreyttara. Þess vegna er mikilvægt að hlúa að tungu okkar og menningu og gera öllum kleift að leggja sitt af mörkum. Sem forseti mun ég nýta reynslu mín af því að fá ólíka hópa til að vinna saman og leitast við að horfa á það hvernig við getum sótt fram um allt land fyrir framtíðina. Ísland er í einstakri stöðu, ríkt af auðlindum náttúru og hugvits, og við höfum alla burði til þess að ná lengra saman. Í þessu samhengi skiptir máli að forseti sé málsvari allra í samfélaginu og tali fyrir sjálfbærni og almannahagsmunum í hvívetna. Það skiptir líka máli að forseti hlúi að mennskunni á tímum örrar tækniþróunar og gervigreindar og sé vakandi yfir þeim áskorunum og tækifærum sem sú þróun getur fært okkur.“

Hver er hæfilegur tími í embætti fyrir forseta?

„Ég tel þrjú til fjögur kjörtímabil vera hæfilegan tíma.“