Undirritunin „merkur áfangi“

Einar Þorsteinsson borgarstjóri og Carlo Monticelli bankastjóri Þróunarbanka Evrópuráðsins undirrituðu í dag 100 milljóna evra lán, sem nem­ur um 15 millj­örðum ís­lenskra króna.

Á lánið að gera Reykjavíkurborg kleift að halda áfram umfangsmiklu viðhaldsátaki í skólahúsnæði borgarinnar. Þá eru tvö önnur lán frá bankanum til Íslands til skoðunar. 

Undirritunin fór fram í aðdraganda 57. sameiginlega fundar Þróunarbanka Evrópuráðsins sem hefst í dag og íslensk stjórnvöld standa að í ár en þar koma saman fulltrúar hluthafa og æðstu stjórnenda bankans.

Þetta kemur fram í tilkynningu frá Reykjavíkurborg. 

Frétt af mbl.is

Lántakan lýsi alvarlegri stöðu í rekstrinum

Fyrirhugað að hefja framkvæmdir á þessu ári

Um er að ræða fjárhæð sem verður varið í viðamikið viðhald og uppbyggingu sem mun tryggja Reykvíkingum öruggt og heilsusamlegt skólahúsnæði, að því er fram kemur í tilkynningunni.

Á þannig að færa skólahúsnæði borgarinnar í nútímalegt horf þar sem aðstaða til kennslu og lærdóms verður í takt við það sem best verður á kosið í nútímakennslufræðum á öllum stigum náms frá leikskóla til loka grunnskóla.

„Endurbætur fjármagnaðar með láni Þróunarbankans miða að því að veita betra aðgengi að menntun og traustara námsumhverfi fyrir alla nemendur. Fjárfestingarnar munu gagnast tæplega 22.500 börnum í Reykjavík, þar á meðal fjölskyldum innflytjenda, úkraínsku flóttafólki og þeim 200 fjölskyldum sem misstu nýlega heimili sín vegna eldsumbrota við Grindavík.“

Fyrirhugaðar fjárfestingar koma til framkvæmda á tímabilinu 2023-2028 og nemur heildarkostnaðurinn 223 milljónum evrum. 

Frétt af mbl.is

Borgin tekur 15 milljarða lán

Merkur áfangi í langvarandi samstarfi

„Undirritunin í dag er merkur áfangi í langvarandi samstarfi okkar við Reykjavíkurborg og Ísland. Þetta 100 milljón evra lán mun bæta gæði og öryggi skólahúsnæðis í Reykjavík svo að bjóða megi upp á nútímalegt námsumhverfi sem nauðsynlegt er fyrir unga fólkið okkar sem er að vaxa úr grasi,“ er haft eftir Carlo Monticelli, bankastjóra Þróunarbanka Evrópuráðsins, í tilkynningunni. 

„Þessi lánasamningur styður okkur í að halda áfram mikilvægu viðhaldsátaki og uppbyggingu á skólahúsnæði í borginni og endurspeglar forgangsröðun okkar í meirihlutanum í þágu skólamála. CEB er traustur banki og mikilsmetinn samstarfsaðili og það skiptir máli að borgin hafi fleiri lánakosti en þá sem bjóðast hérlendis. Við erum afar ánægð með að þessum áfanga hafi verið náð sem mun koma barnafjölskyldum í Reykjavík og starfsfólki til góða,” er haft eftir Einari Þorsteinssyni borgarstjóra í tilkynningunni.  

Tvö önnur lán til skoðunar 

Þá segir að lán Þróunarbankans sé í takt við þau markmið sem sett eru fram í menntastefnu Reykjavíkur 2030 - Látum draumana rætast, sem og í viðhaldsátaki á húnsæði leikskóla, grunnskóla og frístundar 2022 - 2028 þar sem lögð er áhersla á að efla aðstöðu til menntunar og hlúa að mannauði með bættri menntun og starfsþjálfun

„Árið 2024 markar tímamót í samstarfi Íslands og Þróunarbanka Evrópuráðsins. Auk þessa láns til Reykjavíkurborgar er verið að skoða tvö önnur lán til að fjármagna viðbragð vegna eldsumbrota og endurbætur á innviðum sveitarfélaga,“ segir í tilkynningunni. 

Árlegur fundur bankans haldinn á Íslandi

Í tilkynningunni segir jafnframt að Ísland sé eitt átta stofnríkja Þróunarbanka Evrópuráðsins. Frá árinu 1956 hafi Þróunarbankinn samþykkt 10 verkefni á Íslandi og veitt lán upp á meira en 400 milljónir evra. Þar á meðal hafi tvö verið veitt Reykjavíkurborg.

Dagana 6. til 8. júní heldur ríkisstjórn Íslands árlegan sameiginlegan fund Þróunarbanka Evrópuráðsins. Viðburðurinn færist milli aðildarríkjanna 43. Umræður sameiginlega fundarins þetta árið snúa helst að hlutverki Þróunarbankans í að styðja aðildarríki í hamfarastjórnun og viðbrögðum við loftslagsbreytingum.