Samfélagssporið jókst um 20% milli ára

Samfélagsspor af rekstri samstæðu FISK Seafood jókst um 20% milli áranna 2022 og 2023. Á síðasta ári fjárfesti félagið verulegum upphæðum í aflaheimildum og jók fjárfestingu sína í Iceland Seafood International.

Þetta má lesa í nýlegri sjálfbærniskýrslu sem félagið hefur birt.

Fram kemur að samfélagsspor af rekstri samstæðu FISK Seafood nam á síðasta ári tæplega 3,4 milljörðum króna og er það tæplega 32% umfangsmeira samfélagsspor af rekstrinum en árið 2021.

Greiddi félagið meðal annars um 513 milljónir í tekjuskatt, 307 milljónir í tryggingagjald, 477 milljónir í veiðigjöld og 163 milljónir í hafnarsjóði.

Þó nokkrar fjárfestingar

Á síðasta ári áttu sér stað nokkrar fjárfestingar og er greint frá því að helstu fjárfestingarnar hafi verið „kaup félagsins á dragnótarbátnum Hafdísi SK-3. Um svipað leyti var bátnum Lundey SK-3 lagt og hann síðan seldur. Hlutabréf í Iceland Seafood International voru keypt fyrir rúmlega 317 milljónir og á félagið í dag 11,8% hlut í félaginu. Fjárfest var í aflaheimildum fyrir tæplega 1,9 milljarða króna. Á móti þessum fjárfestingum voru aflaheimildir seldar fyrir tæplega 749 milljónir.“

Í tengslum við fjárfestinguna í sölufélaginu Iceland Seafood segir að langstærstur hluti afurða FISK sé seldur í gegnum það félag og dótturfélagið Iceland Seafood Iberica.

„Stærstu viðskiptalönd FISK Seafood fyrir léttsaltaðar og saltaðar afurðir voru Spánn, Ítalía og Grikkland. Sjófrystar afurðir af Arnari HU-1 voru seldar til Bretlands, Póllands og Bandaríkjanna. Afurðir félagsins rötuðu þó einnig á fleiri markaði, þá sérstaklega í Mið- og Norður-Evrópu. Þurrkaðar afurðir voru helst seldar til Nígeríu. Allar afurðir félagsins sem fóru í útflutning voru fluttar sjóleiðina til markaðslandanna,“ segir í skýrslunni.

Nýsmíði undirbúin

Í fyrra var einnig unnið að undirbúningi vegna fyrirhugaðrar nýsmíði togara. „ Í þeim efnum er m.a. horft til nýs orkugjafa, sparneytni í orkunotkun og tengingar við vistvæna raforku í landi. FISK Seafood leggur sitt af mörkum í samstarfsverkefnum SFS (Samtök fyrirtækja í sjávarútvegi) og tekur m.a. þátt í starfi vinnuhóps samtakanna sem leitar leiða til að draga úr kolefnislosun sjávarútvegsins,“ segir í skýrslunni.

Þó er bent á, eins og fjallað var um á 200 mílum nýverið, að skortur á fjárfestingum opinberra aðila í hafnarinnviðunum á Sauðárkróki trufli uppbyggingu félagsins bæði með tilliti til skipa og nýs hátæknifrystihúss.

Frétt af mbl.is

Höfnin stendur samkeppnishæfni fyrir þrifum