Morgunblaðið | 20.7.2024 | 22:52 | Uppfært 21.7.2024 7:33

Á útihátíðum er lögregluhundinum Skara að mæta

Löggæslu- og fíkniefnaleitarhundurinn Skari. Ljósmynd/Aðsend

„Hann er ungur í starfi þannig hann er bara rétt að byrja en hann er auðvitað búinn að fara í leitir svona almennt og vinna það vel,“ segir Heiðrún Huld Finnsdóttir, lögreglumaður á Egilsstöðum, um lögregluhundinn Skara sem er eini lögregluhundurinn á Austurlandi.

Skari er af gerðinni English Springer Spaniel og er tveggja og hálfs árs gamall. Byrjaði hann að vinna hjá lögreglunni á Austurlandi síðasta sumar sem löggæslu- og fíkniefnaleitarhundur og er Heiðrún Huld umsjónarmaður hans.

Frétt af mbl.is

Skari verður lögreglunni á Austurlandi til aðstoðar

Skari er tveggja og hálfs árs og af gerðinni English Springer Spaniel. Ljósmynd/Aðsend

Norræna skoðuð í hverri viku

„Lögreglustjórinn á Austurlandi á hann en ég er alltaf með hann og ber ábyrgð á honum. Þegar hann er ekki í vinnunni þá er hann bara heimilishundurinn minn,“ segir Heiðrún í samtali við mbl.is.

Segir hún stærsta verkefni þeirra félaga að fara í ferjuna Norrænu einu sinni í viku er ferjan siglir þar í gegn.

Ekki láta saklausa augnaráðið plata ykkur. Skari er trylltiæki í vinnunni að sögn Heiðrúnar. Ljósmynd/Aðsend

Tryllitæki í vinnunni

Lýsir hún Skara sem algjöru tryllitæki og segir að um sé að ræða mjög skemmtilegan vinnufélaga.

„Hann er fjörugur, ótrúlega ljúfur og góður. Orkubolti og gleðisprengja. Hann er svona tryllitæki í vinnunni. Ég kalla hann alltaf tryllitækið mitt,“ segir Heiðrún og bætir við.

„Hann er geggjaður og mjög öflugur.“

Eins og fyrr hefur komið fram er Skari eini lögregluhundurinn á Austurlandi en segist Heiðrún vita til þess að hunda sé einnig að finna hjá Lögreglunni á Akureyri og á Sauðárkróki.

„Þeir eru því miður ekki margir en við erum svona að reyna að vekja athygli á þeim. Þetta eru geggjuð vinnutæki.“

Skari að nýta krafta sína til fulls. Hann hefur aðstoðað lögregluna á Austurlandi frá síðasta sumri. Ljósmynd/Aðsend

Nýtir krafta sína á útihátíðunum

Skari er um þessar mundir að nýta krafta sína á listahátíðinni LungA á Seyðisfirði þar sem lokakvöld hátíðarinnar fer fram.

Segir Heiðrún að hún og Skari séu þá einnig að fara á Þjóðhátíð í ár, en þar eru fíkniefnaleitarhundar mikið notaðir.

Hundaunnendur og áhugasamir geta því fundið Skara í Vestmannaeyjum um verslunarmannahelgina en skulu þó passa að hafa ekkert vafasamt í vösum sínum, ellegar er Skara að mæta.

Heiðrún Huld Finnsdóttir, Skari og Hjalti Bergmar Axelsson, aðstoðaryfirlögregluþjónn lögreglunnar á Austurlandi. Myndin var tekin þegar Heiðrún og Skari útskrifuðust sem teymi fíkniefnahunds og stjórnanda í nóvember í fyrra. Ljósmynd/Lögreglan á Austurlandi