Morgunblaðið | 13.8.2024 | 12:01

Myndband: Óvæntur gestur truflaði tónleika Laufeyjar

Tónlistarkonan Laufey Lín Jónsdóttir heldur áfram að heilla heimsbyggðina. mbl.is/Eggert Jóhannesson

Tónlistarkonan Laufey Lín Jónsdóttir heldur áfram að heilla heimsbyggðina upp úr skónum. Það hefur verið nóg um að vera hjá tónlistarkonunni að undanförnu, en hún er á tónleikaferðalagi um heiminn um þessar mundir.

Á dögunum lenti Laufey í óvæntu atviki á tónleikum sínum og deildi því með fylgjendum sínum á samfélagsmiðlum sem eru yfir tíu milljón talsins þvert á miðla hennar.

Í myndbandi sem Laufey birti á TikTok-reikningi sínum sést hún spila lagið Dreamer af plötunni Bewitched, sem hún hlaut Grammy-verðlaun fyrir í byrjun árs. Skyndilega hættir Laufey að syngja og kippist til. „Guð minn góður, það er bjalla,“ segir Laufey svo og hlær, en hún reynir svo að koma bjöllunni í burt sem gekk brösuglega til að byrja með.

Frétt af mbl.is

Laufey hlaut Grammy-verðlaun

Atvikið hefur vakið mikla lukku á samfélagsmiðlum, en af myndbandinu að dæma virtust tónleikagestir skemmta sér konunglega og hlógu að atvikinu. Laufey vitnar svo í texta lagsins og skrifar við myndbandið: „Enginn mun drepa draumórana innra með mér nema þessi bjalla sem réðst á mig í miðju lagi.“