Morgunblaðið | 16.9.2024 | 11:03 | Uppfært 11:21

Karlar á fimmtugsaldri líklegastir til að kjósa Trump

Harris er vinsælli meðal Íslendinga en Trump. AFP

Kamala Harris, varaforseti Bandaríkjanna og forsetaframbjóðandi demókrata, nýtur yfirgnæfandi stuðnings meðal Íslendinga.

Samkvæmt þjóðarpúlsi Gallup myndi 91% íslensku þjóðarinnar kjósa hana ef hægt væri að greiða atkvæði í bandarísku forsetakosningunum.

Aðeins 9% segjast myndu kjósa Donald Trump, fyrrverandi Bandaríkjaforseta og forsetaframbjóðanda repúblikana.

Konur eru líklegri en karlar til að kjósa Harris. Þannig lýsa 96% kvenna stuðningi við varaforsetann samanborið við 85% karla. Þá myndu 15% karla kjósa Trump en aðeins 4% kvenna.

Hér má líta niðurstöður Gallup.

Mestur stuðningur við Harris meðal fólks á sextugsaldri

Sá aldurshópur sem væri líklegastur til að kjósa Harris er fólk á aldrinum 50-59 ára. 97% þeirra segjast myndu kjósa Harris en aðeins 3% segjast myndu kjósa Trump.

Sá aldurshópur sem væri líklegastur til að kjósa Trump er fólk á aldrinum 40-49 ára. 15% segjast myndu kjósa Trump en 85% segjast myndu kjósa Harris.

Þannig má áætla að karlmenn á fimmtugsaldri séu líklegastir til að kjósa Trump.

Þeir sem skila auðu líklegastir til að styðja Trump

Þegar tekið er mið af skoðunum fólks á íslenskum stjórnmálum kemur í ljós að þeir sem myndu skila auðu eða ekki kjósa ef gengið yrði til alþingiskosninga eru jafnframt sá hópur sem er líklegastur til að greiða Trump atkvæði.

Alls 30% þeirra myndu greiða Trump atkvæði og 70% myndu greiða Harris atkvæði.

Þar á eftir koma kjósendur Miðflokksins en 28% þeirra myndu greiða Trump atkvæði og 72% myndu greiða Harris atkvæði.

Alls myndu 21% kjósenda Sjálfstæðisflokksins greiða Trump atkvæði og 79% greiða Harris atkvæði.

Þá myndu 16% kjósenda Flokks fólksins greiða Trump atkvæði og 84% greiða Harris atkvæði.

Yfirgnæfandi meirihluti kjósenda annarra stjórnmálaflokka styður þó Harris. Aðeins 3-4% kjósenda Framsóknarflokksins, Sósíalistaflokksins og Pírata segjast myndu kjósa Trump.

Þá sögðust allir kjósendur Samfylkingarinnar og Vinstri grænna styðja Harris.