Morgunblaðið | 5.10.2024 | 9:16

Höfum tekið á móti of mörgum flóttamönnum

Video Player is loading.

Current Time 0:00

Duration 0:00

Loaded: 0%

Stream Type LIVE

Remaining Time 0:00

Jón Gnarr segir mikilvægt að rétt sé staðið að móttöku flóttafólks til landsins. Engum sé greiði gerður með því að taka á móti svo stórum hópum fólks að ekki verði ráðið við ástandið.

Þetta segir hann í nýjasta þætti Spursmála þar sem hann er spurður út í málaflokkinn sem valdið hefur miklu fjaðrafoki síðustu misserin.

Orðaskiptin um þetta má sjá og heyra í spilaranum hér að ofan. Þau eru einnig rakin í textanum sem á eftir fer.

Hvað er metnaður í mótttöku?

Hvað er metnaður í móttöku?

„Metnaður í móttöku flóttamanna snýst um það fyrir mér að í móttöku flóttafólks verðum við að hafa trausta innviði, og þá er ég að tala um regluverk og húsnæði og mannskap til að taka á móti fólki. Við getum ekki tekið á móti fleira fólki en við höfum innviði til að ráða við.“

Við höfum ekkert húsnæði, ertu þá að segja að við getum ekki tekið á móti fleira fólki?

„Ég veit ekki alveg hver staðan í málaflokknum er en við erum að minnsta kosti á mjög erfiðum stað.“

Jón Gnarr er genginn í Viðreisn og hyggst bjóða sig fram í prófkjöri flokksins í Reykjavík, þegar þar að kemur. mbl.is/María Matthíasdóttir

Tökum ekki endalaust við

Ef við höfum ekki húsnæði, ályktar þú þá þannig að við getum ekki tekið á móti fleira fólki?

„Já, mér finnst það. Við verðum að bjóða fólki upp á eitthvert mannsæmandi búsetuúrræði meðan verið er að fjalla um þeirra mál. Ef við getum ekki gert það þá getum við ekki tekið við fleira fólki. Við getum ekki bara tekið við fólki af því að við viljum taka við fólki. Við verðum líka að sníða okkur stakk eftir vexti og átta okkur á því að við erum mjög lítil þjóð og að okkur langar til að gera gott og langar til að skjóta skjólshúsi yfir fólk á flótta en við getum ekki gert það nema að einhverju ákveðnu marki.“

Finnst þér við hafa gengið of langt í þessum efnum þegar þú horfir yfir sviðið?

„Já, ég tel það að mörgu leyti. Ég tel að við höfum tekið á móti fólki sem við höfum ekki úrræði fyrir. Og það er ekki gott fyrir neinn, það er hvorki gott fyrir gestgjafann né gestinn. Og það leiðir af sér vandamál, árekstra og er grundvöllur fyrir fordóma og annað sem mér finnst algjör óþarfi,“ segir Jón.

Viðtalið við Jón má sjá og heyra í heild sinni í spilaranum hér að neðan.