Morgunblaðið | 8.11.2024 | 9:59

Hefring hlaut Sigölduna

Karl Birgir Björnsson framkvæmdastjóri Hefring Marine og Michael Given sölustjóri félagsins. Ljósmynd/Sjávarútvegsráðstefnan

Við hátíðlega athöfn í Hörpu í gær hlaut tæknifyrirtækið Hefring Marine Sigölduna, hvatningaverðlaun Sjávarútvegsráðstefnunnar og TM.

Hefring Marine er hátæknifyrirtæki sem hannar og framleiðir snjallsiglingakerfi fyrir báta og minni skip. Kerfið safnar í rauntíma upplýsingum um hraða, mælir hreyfingar sjófarsins og safnar gögnum úr siglingakerfum, vélum og búnaði. Það styðst síðan við gervigreind sem veitir stjórnanda sjófarsins ráð um hvernig sé hagstæðast að haga siglingunni. Þannig stuðlar kerfið að hagkvæmari siglingu og auknu öryggi.

Frétt af mbl.is

Nýta snjallsiglingakerfi til lækkunar iðgjalda

Þá er öllum gögnum um siglinguna safnað í skýjakerfi þar sem hægt er að fylgjast með siglingunni í rauntíma og fá allar ferðir vistaðar í skýrslur.

Markmiðið með veitingu verðlaunanna er að „hvetja ung fyrirtæki og frumkvöðla til dáða, stuðla að nýbreytni og vekja athygli almennings á gildi nýsköpunar og þróunar í sjávarútvegi,“ segir um verðlaunin á vef Sjávarútvegsráðstefnunnar.

Jafnframt segir að þau séu „veitt ungum fyrirtækjum eða sjálfstætt starfandi einstaklingum fyrir nýbreytni og þróunarverkefni sem þykir hafa skarað frammúr og skapað væntingar um framlag sem talið er að muni treysta stoðir íslensks sjávarútvegs.“

Sjávarútvegsráðstefnan hófst í gær og lýkur síðdegis í dag.

Frétt af mbl.is

Varpa ljósi á stjórn fiskveiða á Íslandi

Vakið athygli

Hefring hefur vakið töluverða athygli bæði hér á landi og alþjóðlega. Hefur siglingatækjum Hefring meðal annars verið komið fyrir í nýjum björgunarskipum Landsbjargar.

Fyrr á þessu ári var greint frá því að Hefring tryggði sér 2,2 milljón evra fjármögnun, jafnvirði rúmlega 320 milljóna íslenskra króna.