Morgunblaðið | 18.12.2024 | 8:12

Réttarholtsskóli vekur heimsathygli

Ástin liggur í loftinu í Réttarholtsskóla Samsett mynd

Nemendafélag Réttarholtsskóla hefur heldur betur komið á óvart á TikTok með gleðiefni í jólaanda sem fer eins og eldur í sinu um netheima og fær alla til að brosa.

Í myndbandinu er gengið um ganga skólans með mistiltein í hönd sem þýðir aðeins eitt; að þau sem standa undir honum verða að kyssast. Jólastemningin sem hefur myndast á göngum Réttarholtsskóla er bæði fyndin og sjarmerandi og viðbrögðin hafa ekki látið á sér standa.

Myndböndin hafa slegið í gegn víða um heim og náð yfir 9 milljónum áhorfa – og aðdáendur biðja um meira!

Létu ekki staðar numið þar

Krakkarnir í Réttarholtsskóla eru sniðugir og fylgdu fyrsta myndbandinu eftir með seinni hluta sem hefur einnig fengið miklar vinsældir á TikTok. Það myndband er komið upp í 3,2 milljónir áhorfa þegar þetta er ritað. Í myndbandi númer tvö heldur jólastemningin áfram með fleiri mistilteinsaugnablikum og óvæntum kossum.

Réttarholtsskóli hefur sannarlega slegið í gegn með þessum hugmyndaríku myndböndum og hver veit, kannski verður mistilteinninn orðinn ómissandi jólahefð í skólum landsins. Að minnsta kosti er ljóst að jólastemningin í Réttarholtsskóla er smitandi og nær langt út fyrir skólaveggina. Hver ætli verði næstur undir mistilteininum?