Morgunblaðið | 16.1.2025 | 13:59 | Uppfært 14:16

Framleiddu 502 þúsund tonn af laxi

Samstæða Mowi framleiddi 502 þúsund tonn af laxi í fyrra. Ljósmynd/Mowi

Samstæða laxeldisrisans Mowi – sem fer meðal annars með meirihluta hlutafjár í Arctic Fish – setti framleiðslumet á síðasta ári og náði að framleiða 502 þúsund tonn af laxi. Mowi heldur þannig stöðu sinni sem langstærsti framleiðandi lax á heimsvísu.

Fram kemur í tilkynningu Mowi til norsku kauphallarinnar um framleiðslu fjórða ársfjórðungs 2024 að um er að ræða 5,7% aukningu frá 2023 þegar samstæðan framleiddi 475 þúsund tonn. Vert er að geta þess að 2023 voru á heimsvísu framleidd um 2.870 þúsund tonn af laxi sem merkir að samstæða Mowi var með rúmlega 16% heimsframleiðslunnar það ár.

Innan samstæðunnar var á síðasta ári framleitt mest í Noregi, Síle og Skotlandi. Nam framleiðslan 304 þúsund tonn í Noregi, 73 þúsund tonn í Síle og 66 þúsund tonn í Skotlandi. Dótturfélagið Arctic Fish sem rekur eldi á Vestfjörðum framleiddi 11 þúsund tonn.

130 milljarða hagnaður

Rekstrarhagnaður samstæðu Mowi fyrir skatta og fjármagnsliði (e. operational EBIT) var á fjórða ársfjórðungi 226 milljónir evra sem er jafnvirði tæplega 33 milljarða íslenskra króna. Með þessu er rekstrarhagnaðurinn fyrir skatta og fjármagnsliði fyrir allt árið 2024 kominn í 889 milljónir evra, eða tæplega 130 milljarða íslenskra króna, miðað við uppgjör þriðja ársfjórðunga.

Taka ber þó fram að endanlegt uppgjör Mowi fyrir 2024 liggur ekki fyrir og geta tölurnar tekið breytingum.

Rekstrarhagnaður án skatta og fjármagnsliða á hvert framleitt kíló á fjórða ársfjórðungi var hæstur í Noregi þar sem hann var 2,2 evrur og næst hæstur var hann í Skotlandi þar sem fengust 1,4 evrur úr hverju kílói. Hjá Arctic Fish var hann aðeins 0,75 evrur.