Morgunblaðið | 28.1.2025 | 7:45 | Uppfært 8:12

Áfram verður leitað að loðnunni

Áformað var að uppsjávarveiðiskipið Aðalsteinn Jónsson færi til loðnuleitar í gærkvöldi. Ljósmynd/Börkur Kjartansson

Áformað var að tvö uppsjávarveiðiskip, Polar Ammassak og Aðalsteinn Jónsson, færu til loðnuleitar í gærkvöldi. Þetta sagði Gunnþór Ingvason, framkvæmdastjóri Síldarvinnslunnar í Neskaupstað, í samtali við Morgunblaðið í gær, en hann sat þá ásamt skipstjórum sínum og fulltrúa Hafrannsóknastofnunar yfir korti og leitarlínum við að skipuleggja framhald loðnuleitar.

Samkvæmt bráðabirgðaniðurstöðum Hafrannsóknastofnunar, sem kunngjörðar voru fyrir helgi, mældist ekki nægjanlegt magn loðnu í leiðangri sem Árni Friðriksson rannsóknarskip Hafró tók þátt í ásamt þremur uppsjávarveiðiskipum, Polar Ammassak, Heimaey og Barða. Leitað var norður og austur af landinu og fundust aðeins um tveir þriðju hlutar þess magns sem mældist í september 2024. Tók Hafró fram að eftir ætti að ljúka leit Árna Friðrikssonar út af Vestfjörðum. Þá er mælingum ólokið vestur af landinu.

Sagði Gunnþór að til stæði að leita betur á norðaustursvæðinu, en menn hefðu trú á því að loðnan væri að fara að koma upp í kantinn.

Gefur ekki upp vonina

Vart varð við loðnutorfu fyrir suðaustan land á sunnudagsmorgun en ekki er vitað hve mikið magn var þar á ferð.

„Loðnan er brellin og hefur alltaf verið og við höfum oft verið á þessum stað á þessum tíma árs undanfarin tíu ár, það er ekkert nýtt í því,“ segir hann. „Ég er ennþá bjartsýnn. Það hefur gefist vel að gefa ekki upp vonina. Hér áður fyrr vorum við oft með fjölda skipa við loðnuleit sem fundu ekki neitt, en svo birtist loðnan skyndilega,“ segir Gunnþór.

Lesa má meira um málið í Morgunblaðinu í dag