Morgunblaðið | 22.2.2025 | 13:13

Gefa Norðmönnum 1% loðnukvótans

Íslensku loðnuskipin fá mögulega loðnukvóta Norðmanna. mbl.is/Börkur Kjartansson

Loðnusamningur milli Íslands og Grænlands frá árinu 2023 gerir ráð fyrir að Íslendingar fá 6.957 tonna loðnukvóta eða 81% af 8.589 hámarksafla vetursins. Þá fá Grænlendingar 1.546 tonn eða 18% og eru sett til hliðar 86 tonn eða 1% fyrir Norðmenn.

Þetta upplýsir matvælaráðuneytið í svari við fyrirspurn Morgunblaðsins. Þar er vakin athygli á því að ekki sé meira sett til hliðar fyrir Norðmenn því þeir hafi ekki gengist við nýjum loðnusamningi.

Á fimmtudag var þó greint frá því að íslenskum uppsjávarskipum verði aðeins úthlutað 4.683 tonna loðnukvóti.

Frétt af mbl.is

Íslendingar fá aðeins 54% loðnukvótans

Í svari ráðuneytisins kemur fram að draga hafi þurft útistandandi skuldbindingar frá hlutdeild Íslands. „Ísland er með tvíhliða samning við Færeyjar og fær þar m.a. aðgang til kolmunnaveiða í færeyskri lögsögu á meðan Færeyjar fá m.a. loðnukvóta frá Íslandi. Færeyski kvótinn verður því 429 tonn.“

Íslendingar skulda

Þá er einnig dregin af hlut Íslands umframveiðiskuld sem stofnað var til á vertíðinni 2022/2023 í samræmi við eldri loðnusamning frá 2018 og er hún 1.915 tonn. Þessi tonn skiptast milli Grænlands og Noregs.

Ráðuneytið bendir þó á að norsk skip hafi ekki heimild til að stunda loðnuveiðar í íslenskri lögsögu vegna þess að Noregur hafi ekki gengist við fyrrnefndum samningi. Að óbreyttu munu því þau tonn, sem eru tekin frá fyrir Norðmenn, falla í hlut íslenskra loðnuskipa.