Morgunblaðið | 31.3.2025 | 15:14

Vilja banna endurvigtun strandveiðiafla

Ríkisstjórnin vill banna endurvigtun strandveiðiafla og leggur til að allur afli bátanna verði skráður að lokinni vigtun á hafnarvog. mbl.is/Hafþór Hreiðarsson

Atvinnuvegaráðuneytið hefur birt í samráðsgátt stjórnvalda drög að breytingum á reglugerð um vigtun og skráningu afla. Felur breytingin í sér að aflaskráningu strandveiðibáta verði lokið á hafnarvog.

„Með þeirri breytingu muni endurvigtunum fækka um þúsundir árlega með minni líkum á mistökum við innslátt upplýsingum. Þá mun breytingin einnig draga verulega úr möguleikum á rangri skráningu á ís í afla,“ segir um máli í samráðsgátt.

Vakin er athygli á að rúmur helmingur allra landana dagróðrabáta sé vegna strandveiða og stendur til að meta reynsluna af breytingunni með það fyrir sjónum að meta hvort tilefni sé að ljúka allri vigtun dagróðrabáta á hafnarvog við löndun.

„Breytingin er mikilvægt skref til að auka traust, trúverðugleika og öryggi í fiskveiðistjórnun og muni stuðla að hagkvæmari ferlum við skráningu sjávarafla,“ segir í kynningunni.