Morgunblaðið | 16.4.2025 | 5:30 | Uppfært 6:38

Vinnubrögð ráðherra gagnrýnd

Hanna Katrín Friðriksson er ráðherra atvinnuveganna. mbl.is/María Matthíasdóttir

Samtök fyrirtækja í sjávarútvegi (SFS) gagnrýna vinnubrögð og málatilbúnað Hönnu Katrínar Friðriksson atvinnuvegaráðherra við gerð frumvarpsdraga um hækkun veiðigjalda. Þar er bæði vikið að formlegum kröfum, sem gera verði til stjórnarfrumvarpa, og efnislegum þáttum og forsendum þess.

Þetta kemur fram í ítarlegri 69 síðna umsögn SFS um frumvarpsdrögin, en henni fylgdu greiningar og álit frá KPMG, Jakobsson Capital og norsku lögmannsstofunni Wikborg Rein, sem SFS segja að hafi verið nauðsynlegt að láta vinna; ráðherra hafi vanrækt þær skyldur.

SFS færa rök fyrir því að fyrirætlanir ráðherra gangi í berhögg við stjórnarskrá, brjóti gegn jafnræði og meðalhófi, og byggist á óraunhæfum forsendum, svo sem verði á uppboðsmörkuðum sem ekki endurspegli raunverðmæti afla.

Þá er ráðherra átalinn fyrir að hafa ekki enn afhent umbeðin gögn, en frumvarpsdrögin uppfylli ekki grundvallarkröfur um undirbúning, rannsókn, mat á áhrifum og samráð við hagaðila.

Hver og einn þessara þátta sé alvarlegur ágalli á frumvarpinu, en bent er á að jafnvel útreikningar ráðuneytisins á boðaðri heildarhækkun á veiðigjaldi virðist rangir svo skeiki milljörðum króna.

Atvinnuvegaráðherra hefur beðist undan viðtali við Morgunblaðið síðan á föstudag, en í gær var blaðinu greint frá því að það yrði enn að bíða þar til eftir páska.