Morgunblaðið | 19.4.2025 | 11:03

Þórunn Þórðardóttir bilaði við síldarmælingar

Þórunn hefur legið við bryggju síðustu vikurnar. mbl.is/Árni Sæberg

Bilun kom upp í öðrum rannsóknarleiðangri hafrannsóknaskipsins Þórunnar Þórðardóttur HF 300 þegar skipið var við síldarmælingar í Kolluál, vestan við Snæfellsnes. Skipið hafði þá nýlokið sínu fyrsta togararalli í lok mars.

Hefur Þórunn legið um kyrrt í höfn Hafnarfjarðar síðan bilunin kom upp.

Að sögn Þorsteins Sigurðssonar, forstjóra Hafrannsóknastofnunar, má rekja bilunina til hugbúnaðarvillu sem leiddi til þess að vélarkerfi skipsins sló út.

„Það er auðvitað ekki mikið öryggi í því,“ segir Þorsteinn í samtali við Morgunblaðið og bætir við að tekin hafi verið ákvörðun um að sigla skipinu til baka.

Frétt af mbl.is

Fyrsta marsralli Þórunnar lokið

Heldur til hafs á ný eftir páska

Þrátt fyrir bilunina náðist að klára mælingarnar. Rannsóknaskipið Árni Friðriksson var kallað til og tók við verkefninu án frekari tafa.

Þá segir Þorsteinn að sérfræðingur frá vélarframleiðandanum, The Anglo Belgian Corporation (ABC) í Belgíu, hafi verið fenginn til landsins og sinnt viðgerð á þeim hluta búnaðarins sem olli trufluninni.

Að lokum bætir hann við að Þórunni hafi verið komið í lag í síðustu viku og áformað sé að hún haldi aftur til hafs fljótlega eftir páska, að þessu sinni í rækjurannsóknir, einnig í Kolluál.

Þórunn Þórðardóttir HF 300 var afhent Hafrannsóknastofnun 12. mars síðastliðinn og er skipið nefnt eftir Þórunni Þórðardóttur, sem var fyrst íslenskra kvenna til að mennta sig á sviði sjávarlíffræði.

Tók skipið við af Bjarna Sæmundssyni, sem hafði þjónað hafrannsóknum við Ísland í tæp 55 ár en hefur nú verið seldur til Noregs.