Morgunblaðið | 29.4.2025 | 7:05 | Uppfært 11:20

Daníel tekur við forstjórastöðunni

Daníel Jakobsson hefur verið ráðinn nýr forstjóri Arctic Fish á Vestfjörðum. mbl.is/Helgi Bjarnason

Arctic Fish hefur ráðið Daníel Jakobsson sem forstjóra frá og með 1. maí, að því er fram kemur í fréttatilkynningu frá fiskeldisfyrirtækinu. Tekur hann við af Stein Ove Tveiten sem gegnt hefur starfinu um árabil, en hann verður ráðgjafi hjá fyrirtækinu til 1. júní.

Daníel hefur gegnt stjórnunarstöðu hjá Arctic Fish frá árinu 2021 og veitt viðskiptaþróun fyrirtækisins forstöðu. Þá segir í tilkynningunni að hann hafi á þessum tíma „öðlast yfirgripsmikla þekkingu á starfsemi og stefnu fyrirtækisins. Leiðtogahæfileikar hans, sérfræðiþekking og djúpar rætur í samfélaginu á Vestfjörðum gera hann vel til þess fallinn að leiða fyrirtækið í því vaxtarskeiði sem fram undan er hjá Arctic Fish.“

Arctic Fish stundar laxeldi á Vestfjörðum og hefur yfir að ráða samfelldri virðiskeðju, allt frá klaki fiskseiða til sölu afurða. Félagið hefur leyfi til framleiðslu 29.800 tonna á tíu eldisstaðsetningum í fimm fjörðum, þeim Patreksfirði, Tálknafirði, Arnarfirði, Dýrafirði og Ísafjarðardjúpi.

Seiðaeldi félagsins er í Tálknafirði, fóðurmiðstöð á Þingeyri, skrifstofur á Ísafirði og hátæknilaxavinnsla í Bolungarvík.

Arctic Fish rekur laxeldi á Vestfjörðum. Ljósmynd/Arctic Fish: Haukur Sigurðsson

Markmið um starfsþróun

„Við erum mjög ánægð með ráðningu Daníels. Laxeldi á Íslandi er enn ung atvinnugrein og lykillinn að áframhaldandi árangri veltur á framúrskarandi starfsemi sem byggir á öflugri dýravelferð, ábyrgri umhverfisstefnu og traustum fjárhag ásamt öryggi og velferð starfsfólks. Daníel hefur víðtæka þekkingu á allri starfsemi fyrirtækisins og verður með starfsstöð á Ísafirði,“ er haft eftir Øyvind Oaland, stjórnarformanni Arctic Fish.

Þá er ákvörðun stjórnar Arctic Fish að ráða úr röðum starfsmanna fyrirtækisins sögð endurspegla markmið um að starfsþróun sé grunnurinn að vexti fyrirtækisins til framtíðar.

„Arctic Fish gegnir mikilvægu hlutverki í atvinnulífi Vestfjarða við framleiðslu á heilsusamlegri fæðu, í sátt við samfélag og umhverfi. Laxeldi hefur þegar markverð áhrif á útflutningstekjur Íslands og mikil tækifæri eru fram undan. Ég er því mjög spenntur að halda áfram á þessari vegferð og þróa enn frekar samkeppnishæfa, framsækna og sjálfbæra starfsemi með öflugum hópi starfsfólks Arctic Fish,“ segir Daníel Jakobsson, nýr forstjóri Arctic Fish, í tilkynningu fyrirtækisins.