Morgunblaðið | 19.5.2025 | 18:04

Vill nefnd til að fjalla um sérstakan saksóknara

Guðrún Hafsteinsdóttir dómsmálaráðherra. mbl.is/Árni Sæberg

Guðrún Hafsteinsdóttir, formaður Sjálfstæðisflokksins, hyggst leggja fram þingsályktunartillögu um rannsókn á störfum réttarvörslu- og eftirlitsstofnana í kjölfar fjármálahrunsins. Frá þessu greindi hún í óundirbúnum fyrirspurnum á Alþingi í dag.

Í tilkynningu frá Sjálfstæðisflokknum kemur fram að í tillögunni verður lagt til að skipa þriggja manna rannsóknarnefnd sem skuli rannsaka starfsemi þeirra réttarvörslu- og eftirlitsstofnana sem komu að rannsókn og málsmeðferð sakamála í kjölfar fjármálahrunsins árið 2008.

Nefndin mun taka til umfjöllunar ákvarðanir embættis sérstaks saksóknara varðandi rannsóknir mála, m.a. um þvingunarráðstafanir, ákærur og niðurfellingu mála.

Má ekki treysta á að kerfið rannsaki sig sjálft

„Þá mun rannsóknarnefndin einnig fjalla um hvort starfsemi embættisins hafi verið í samræmi við lög og reglur og mun taka til athugunar störf annarra stofnanna og embættismanna, svo sem lögreglunnar, embættis ríkissaksóknara, Fjármálaeftirlitsins, samkeppniseftirlitsins, skattrannsóknarstjóra ríkisins og annarra réttarvörslu- og eftirlitsstofnanna.

Nefndinni verði heimilt, að því marki sem nauðsynlegt þykir, að láta rannsókn taka til atburða eftir að embætti sérstaks saksóknara var lagt niður eða gera tillögu um frekari rannsókn á slíkum atburðum. Hún mun skila Alþingi niðurstöðum og tillögum að úrbótum eigi síðar en ári frá skipun hennar,“ segir í tilkynningunni.

Þá er haft eftir Guðrúnu Hafsteinsdóttur: „Ef réttarkerfið á að njóta trausts þarf það að vera undir eftirliti – og þegar efasemdir vakna um lögmæti beitingar valdsins, má hvorki stinga þeim undir teppið né treysta því að kerfið rannsaki sjálft sig.“