Morgunblaðið | 5.6.2025 | 12:21 | Uppfært 6.6.2025 11:12

„Fólkið á Íslandi styður okkur“

Elissa May Phillips and Sahar Babaei i héraðsdómi í dag. mbl.is/Karítas

Aðgerðasinnarnir Sahar Babaei frá Íran og Elissa May Phillips frá Bretlandi sem ákærðar eru í tengslum við mótmæli um borð í Hvali 8 og Hvali 9 í september árið 2023, lýstu yfir sakleysi sínu áður en þær gengu inn í dómsal í Héraðsdómi Reykjavíkur í dag þar sem fyrirtaka fór fram í máli þeirra.

Ánægðar að fá að svara fyrir þetta

„Við erum saklausar“ sögðu þær Sahar og Elissa May fyrir utan dómsal 402 í héraðsdómi. Þær eru ákærðar í þremur ákæruliðum. Fyrir brot á siglingalögum, húsbrot og brot gegn valdstjórninni. Spurðar segja þær ákærur í málinu ekki koma á óvart. „Við erum ánægðar að fá að svara fyrir þetta því þegar heildarmyndin er skoðuð þá skiptir það engu máli. Þetta snýst um hvalina og veiðarnar sem eru enn í gangi,“ segir Elissa.

Ef þið væruð í sömu sporum í dag, mynduð þið aftur gera það sama?

„Alveg klárlega, segir Elissa.“

„Við vitum að fólkið á Íslandi styður okkur og ef þessar aðgerðir okkar hafa áhrif á ákvörðun um hvalveiðar sem verður tekin síðar á þessu ári, þá erum við ánægðar að hafa tekið þátt í því að færa þetta mál í réttlátan farveg,“ segir Sahin.

Hvalur hf. kærði þær eftir að þær mótmæltu fyrirhuguðum hvalveiðum fyrirtækisins Hvals hf. Fóru þær um borð í skipin í heimildarleysi aðfaranótt mánudagsins 4. september og komu sér fyrir í tunnum í mastri skipanna og neituðu í kjölfarið að yfirgefa þau þrátt fyrir fyrirmæli lögreglunnar.

Í einn og hálfan sólarhring

Mótmælin fengu mikla athygli, en konurnar komu ekki niður fyrr en einum og hálfum sólarhring síðar eftir mikið samtal við lögregluna sem að endingu aðstoðaði þær við að fara niður úr möstrunum.

Frétt af mbl.is

Ákærðar fyrir mótmæli í hvalveiðiskipum Hvals

Þær voru í kjölfarið færðar á brott í lögreglubíl. Sama dag lögðu skipin af stað til hvalveiða. Eru þær kærðar fyrir að óhlýðnast fyrirmælum lögreglu.

Lögmaður kvennanna lagði fram frávísunarkröfu á hluta sakargifta og verður hún tekin fyrir í ágúst.

Þinghald fer fram 30. október en aðalmeðferð fer fram í málinu á næsta ári.