Morgunblaðið | 9.7.2025 | 6:37

Grípur ekki smærri fyrirtæki

Jens Garðar segir fjölmörg sveitarfélög hafa varað við áhrifum frumvarpsins á sveitarfélögin. mbl.is/María

Jens Garðar Helgason, þingmaður og varaformaður Sjálfstæðisflokksins, segir ótal umsagnir hafa borist á seinustu dögum varðandi frumvarpið um hækkun veiðigjalda og ítrekar að engin greining á áhrifum frumvarpsins hafi verið unnin.

Stjórn samtaka sjávarútvegssveitarfélaga gagnrýndi í gær frumvarpið sem hún telur að þurfi að vinna betur á grundvelli nýrra gagna.

Frétt af mbl.is

Áhrifamat sé nauðsynlegt

26 sveitarfélög senda inn umsagnir

„Það var ekki unnin nein greining á áhrifum frumvarpsins á sveitarfélögin. Tuttugu og sex sveitarfélög senda aftur, bara núna í júlí, inn umsagnir og eru að fara fram á að þessi greining verði unnin,“ segir Jens Garðar í samtali við mbl.is.

„Það er verið að kalla eftir því og þetta hefur meðal annars verið einn af stóru punktunum og stóru rökunum í okkar ræðum.“

Hann segir nýjar tölur frá Deloitte sýna að þessi gjöld verði til þess að 75-90% af rekstrarafkomu sjávarútvegsfyrirtækjanna fari í opinber gjöld, þrátt fyrir hækkun á frítekjumarki.

„Þrátt fyrir hækkunina á frítekjumarki og allt það sem stjórnarliðarnir hafa verið að tala um, þá bara grípur frumvarpið ekki litlu og meðalstóru fyrirtækin.“

Frétt af mbl.is

Segir óljóst hvort að samþjöppun muni aukast

Geti leitt til aukinnar samþjöppunar

Í yfirlýsingu stjórnar Samtaka sjávarútvegssveitarfélaga er fjallað um að verulegar líkur séu á að hækkun veiðigjalds leiði til aukinnar samþjöppunar innan geirans. Jens Garðar tekur í sama streng.

„Þetta mun verða til þess að það verður örugglega erfitt fyrir marga sem eru með litlar og meðalstórar útgerðir að reka fyrirtækin í núverandi mynd og menn þurfa að leita til sameiningar. Ég get svo sem ekkert sagt nákvæmlega til um það á þessari stundu en þessum varnaðarorðum hefur verið haldið uppi við okkur.“