Morgunblaðið | 16.7.2025 | 16:00 | Uppfært 16:34

Enn er beðið eftir ákvörðun

Enn er óljóst hvort bætt verði við strandveiðikvótann. mbl.is/Hafþór Hreiðarsson

Enn er beðið eftir ákvörðun frá atvinnuvegaráðherra hvort bætt verði við strandveiðikvótann. Aðeins er rétt rúmt prósent eftir af veiðiheimildinni eins og er, eða um 122 tonn.

Málið er í deiglunni í atvinnuvegaráðuneytinu að sögn Dúa Landmark, upplýsingafulltrúa atvinnuvegaráðuneytisins. Hann segir svona ákvörðun oft taka tíma.

Örn Pálsson, framkvæmdastjóri Landssambands smábátaeigenda, sagði við mbl.is fyrr í dag að hann telji að sá kvóti sem eftir er komi á land í dag. Sagðist hann að auki vonast til þess að það takist að bæta við kvótann til þess að tryggja 48 daga veiðitímabil.

Hann sagðist einnig halda að það þyrfti að bæta 5-6 þúsund tonnum við kvótann eins og hann er nú, til þess að ná að tryggja 48 daga veiðitímabil.