Morgunblaðið | 17.7.2025 | 13:21 | Uppfært 18:24

Strandveiðar færast til innviðaráðuneytis

Eyjólfur Ármannsson innviðaráðherra sér nú um málefni strandveiða. mbl.is/Ólafur Árdal

Byggðakerfið, sem felur í sér strandveiðar, byggðakvóta o.fl., verður flutt yfir á málefnasvið innviðaráðuneytisins úr atvinnumálaráðuneytinu. Innviðaráðuneyti er nú þegar ráðuneyti byggðamála.

Þetta kemur fram í tilkynningu frá Stjórnarráðinu um breytingar á forsetaúrskurði um skiptingu stjórnarmálefna milli ráðuneyta.

Þar segir að breytingin hafi verið rædd á ríkisstjórnarfundi í gær og að forseti hafi þegar skrifað undir hana og hefur breytingin því tekið gildi.

„Með breytingunni flyst ábyrgð á stjórnarmálefninu byggðakerfi, eða svokölluðu 5,3% kerfi, úr atvinnuvegaráðuneyti og yfir í innviðaráðuneyti. Undir byggðakerfið fellur almennur byggðakvóti, sértækur byggðakvóti, strandveiðar, línuívilnun, skel- og rækjubætur og frístundaveiðar,“ segir í tilkynningunni.