Vinnslur í eigu stórútgerða hækka verð

Hátt verð á óunnum fiski á mörkuðum hefur þyngt róður fiskvinnslunnar Ísfisks á Breiðdalsvík gífurlega. Framkvæmdastjóri segir vinnslur í eigu útgerðanna kaupa fisk af þeim undir markaðsverði og öðlast þannig óeðlilegt samkeppnisforskot á smærri fyrirtæki.

Albert Svavarsson, framkvæmdastjóri Ísfisks, segir í viðtali við fréttastofu RÚV að fiskvinnslur í eigu stórútgerða hafi hækkað verð svo á innlendum mörkuðum að rekstrargrundvöllur fyrir smærri fyrirtæki sé allt að því brostinn. 

Tvöföld verðmyndun felst í því að vinnslur í eigu stórútgerða kaupa fisk frá útgerðum á talsvert lægra verði en greiða þarf fyrir hann á markaði. Þannig skapast samkeppnisforskot sem vinnslur í eigu útgerða hafa á smærri framleiðendur.

Eins og fram kom í frétt 200 mílna nýverið hafa SFÚ, Samtök fiskframleiðenda og útflytjenda, deilt hart á stjórnvöld fyrir að fara ekki eftir tilmælum Samkeppniseftirlitsins og sporna við tvöfaldri verðmyndun á fiskmarkaði hérlendis, en ekki haft erindi sem erfiði. Ekkert bólar á aðgerðum stjórnvalda til að jafna leikinn þrátt fyrir kröfur markaðsaðila og Samkeppniseftirlitsins þar um.

Á vef RÚV er haft eftir Alberti að „stóru fyrirtækin hafa í auknum mæli sótt mjög inn á fiskmarkaðinn og eru í dag farin að kaupa allt að 50% af öllum þorski á fiskmörkuðum og hafa þrýst verðinu mjög mikið upp þar“.

Þetta geri það að verkum að „fiskmarkaðsverð er eins og það er búið að vera núna undanfarið út af þessum þrýstingi; komið það hátt að rekstrargrundvöllurinn er ekki fyrir hendi, sérstaklega á minni einingum, þá verða þær bara að lúta í lægra haldi og gefa eftir,“ segir Albert Svavarsson.

Hann kallar því eftir því að yfirvöld skyldi stórútgerðir til að nota markaðsverð í viðskiptum innan samstæðu eða í viðskiptum tengdra aðila. Að mati Alberts yrðu slíkar aðgerðir til þess fallnar að jafna þann aðstöðumun sem nú sé til staðar í greininni.

• Blogga um frétt