„Við skrifum ekki undir þetta“

Fulltrúar Sjómannafélags Íslands ætla ekki að samþykkja nýjan kjarasamning sjómanna til handa sínum félagsmönnum að óbreyttu ákvæði sem þeir segja skerða veikindarétt sjómanna.

Fyrirsvarsmenn Sjómannafélags Íslands funduðu með fulltrúum útgerða í gærkvöldi. Viðræðum var slitið án niðurstöðu.

Stjórnarmaður í Sjómannafélagi Íslands fullyrðir í samtali við mbl.is að félagið muni ekki ganga að þeim samningum sem lagðir hafa verið fyrir félagið og Sjómannasamband Íslands skrifaði undir á sunnudagskvöld.

Ástæðuna segir hann vera að í nýju samningunum sé veikindaréttur sjómanna skertur um allt að helming. „Við bara skrifum ekki undir þetta að óbreyttu. Það er alveg á hreinu,“ segir Bergur Þorkelsson.

Félagið birti nýja samninginn á Facebook-síðu sinni í gær og það gerði Sjómannasamband Íslands að sama skapi á sinni síðu.

Spunnust þar heitar umræður í athugasemdum við birtingu samningsins og ljóst að menn eru vægast sagt efins um efni hans.

• Blogga um frétt