Met á met ofan hjá Ruth

Danska uppsjávarskipið Ruth kom til hafnar með 2.400 tonn af makríl. Aflaverðmæti skipsins frá því í mars er komið yfir 2,5 milljarða króna.

Frá þessu er greint á færeyska vefsvæðinu fiskur.fo.

Ruth er stærsta uppsjávarskip danska fiskiflotans og eru 9 manns í áhöfn. Ruth er 87,8 metrar á lengd, 16,7 metrar á breidd og 3.720 brúttótonn.

Skipið hóf veiðar um miðjan mars á þessu ári og hefur síðan þá landað afla að verðmæti rúmlega 160 milljóna danskra króna, eða um 2,6 milljörðum íslenskra króna. 

Nýlega var frá því greint á vef Fiskifrétta að Ruth hefði sett löndunarmet þegar skipið kom til hafnar í Egersund í Noregi með 2.140 tonn af síld, að verðmæti 237 milljóna íslenskra króna.

Skipið bætti svo um betur þegar það landaði 2.400 tonnum af makríl í Hirtshals í Danmörku. Þetta er stærsta löndun á ferskum makríl í Danmörku, að því er fram kemur á vefnum FiskerForum.

Haft er þar eftir skipstjóra Ruth að ekki sé einungis um að ræða stærstu makríllöndun í Danmörku, heldur einnig í Noregi, Færeyjum og Skotlandi.

• Blogga um frétt