Fyrsta humri ársins hjá Vinnslustöðinni í Vestmannaeyjum var landað úr Brynjólfi VE föstudaginn 8. maí og er Drangavík VE einnig á humarveiðum. Bátarnir hafa verið í Skeiðarárdýpi fyrstu daga vertíðarinnar, að því er fram kemur í færslu á vef Vinnslustöðvarinnar.

Þar segir að humarvertíðin sé tíðindalítil eins og gera mátti ráð fyrir vegna veikrar stöðu humarstofnsins og ráðlagði Hafrannsóknastofnun útgáfu lágmarkskvóta í vísindaskyni til að fylgjast með heilsufari stofnsins. Af gögnum Hafrannsóknastofnunar að ráða sést að nýliðun skortir í humarstofninum. Á vef Vinnslustöðvarinnar er fullyrt að „það tengist hvorki veiðum né veiðarfærum heldur einhverjum aðstæðum í lífríki sjávarins“.

Ekkert af humri við Eyjar

„Þorlákshafnarmenn og Hornfirðingar byrja yfirleitt á undan okkur Eyjamönnum í humrinum, í mars eða apríl. Vertíðin hefst á austursvæðinu, frá Hornafjarðardýpi að Skeiðarárdýpi og færist svo vestar þegar líður á vorið og fram á sumar,“ útskýrir Sverrir Haraldsson, sviðsstjóri bolfiskvinnslu hjá Vinnslustöðinni, í færslunni.

„Undanfarin ár hefur mest veiðst við Eldey og humar er veiddur líka í Jökuldýpi en þar er nú lokað vegna verndaraðgerða. Lónsdýpi er sömuleiðis lokað og svæði á Breiðamerkurdýpi. Hér við Eyjar hefur sama og ekkert veiðst af humri í mörg ár.“

Humarinn er eftirsóttur, en dregið hefur úr eftirspurn í Evrópu vegna faraldursins. mbl.is/Sigurður Bogi Sævarsson

Sverrir segir nýliðun skorta í stofnin. „Eingöngu hefur veiðst stór humar undanfarin ár en nú kemur fyrir að smár humar fáist líka. Það gefur veika von um skárri tíð en við þurfum fleiri og skýrari vísbendingar og mun meiri gögn til að byggja á og draga af ályktanir.“

Vinnslustöðin selur heilfrystan humar til Spánar og humarhala á markaði víða á meginlandi Evrópu, segir hann og bendir á að um þessar mundir eru veitingahús víða lokuð vegna kórónuveirunnar og engin spurn eftir humri. „Við veiðum því og framleiðum eftir hendinni og reynum að spila úr þeim markaðsfærum sem gefast þegar faraldrinum linnir og lífið færist í fyrra horf, þar á meðal í veitingahúsarekstri.“

Tengdar fréttir

Humarveiðar

Humarveiðarnar voru skemmtilegt tímabil

• Ráðleggja áframhaldandi humarveiðibann
• „Við höfum ekkert gaman af svartsýni“
• Tilkynna vísbendingar um vaxandi stofn humars
• Humarinn mjög kresinn á búsvæði

» Fleiri tengdar fréttir

• Blogga um frétt