Lögreglan á Vestfjörðum stefnir að því að klára yfirheyrslur yfir skipverjum á frystitogaranum Júlíusi Geirmundssyni  ÍS-270 í dag segir Karl Ingi Vilbergsson, yfirlögregluþjónn á Vestfjörðum. Hann segir að ekki sé búið að ræða við skipstjóra skipsins. 

„Við ætlum að klára að tala við vitnin og tökum svo ákvörðun um það hvort einhver verður sakaður um brot,“ segir Karl Ingi í samtali við mbl.is. 

Að sögn hans hefur tekist vel að ná heildarmynd á málið. „Já, við komumst yfir heilmikið í gær og vonumst til þess að ná að klára yfirheyrslurnar í dag,“ segir Karl. 

Hann segir að vel hafi gengið að ná í skipverjana 25 enda séu þeir allir í sóttkví. 

Vanræksla refsiverð 

Í sjómannalögum eru m.a. tilgreind réttindi og skyldur skipstjóra. Er þar m.a. tilgreint að refsing vegna vanrækslu skipstjóra geti varðað allt að fjögurra ára fangelsi. Verði af ákæru má m.a. gera ráð fyrir því að málið varði 34. og 76. grein sjómannalaga. 

Í öðru ákvæði 34. greinar laganna segir. „Ef ástæða er til að ætla að skipverji sé haldinn sjúkdómi sem hætta stafar af fyrir aðra menn á skipinu skal skipstjóri láta flytja sjúklinginn í land ef eigi reynist unnt að verjast smithættu á skipinu.“

Í 76. grein laganna segir að „ef skipstjóri misbeitir agavaldi sínu eða beiti hann ónauðsynlegri harðneskju við skipverja, vanræki skyldur sínar við veika eða slasaða skipverja eða láti hann skipverja eigi fá lögboðið viðurværi varðar það sektum, fangelsi allt að tveimur árum eða fangelsi allt að fjórum árum ef miklar sakir eru^“.

Tengdar fréttir

Covid-veikir skipverjar á Júlíusi Geirmundssyni

Skipstjórinn á Júlíusi Geirmundssyni sýknaður

• Skipstjóri sakfelldur vegna Covid-smits skipverja
• Segir óhugsandi að útgerðin hafi ekki ráðið för
• Sviptur skipstjóri á Júlíusi ráðinn stýrimaður
• Ekki ljóst hvort allir nái heilsu á ný

» Fleiri tengdar fréttir

• Blogga um frétt